ސޮނީ ޓީވީގެ "އިންޑިއާސް ބެސްޓް ޑާންސާ" ހަތަރު ވަނަ ސީޒަންގެ ޖަޖެއްގެ ގޮތުގައި ބޮލީވުޑްގެ ކުރީގެ މަޝްހޫރު ބަތަލާ ކަރިޝްމާ ކަޕޫރް ބައިވެރިވާނެ ކަމަށް ރިޕޯޓްތައް ބުނެފި އެވެ.
މީޑިއާތަކުން ބުނީ އާ ސީޒަންގެ ތައްޔާރީޔައް މިހާރު ކުރިއަށްދާ އިރު، ޝޯގެ ކުރީގެ ސީޒަންތަކުގައި ޖަޖްކަންކޮށްފައިވާ މަޝްހޫރު ކޮރިއޮގްރާފަރުން ކަމަށްވާ ގީތާ ކަޕޫރާއި ޓެރެންސް ލެވިންސް ވެސް ޖަޖުންގެ ޕެނެލްގައި ހިމެނޭނެ ކަމަށެވެ.
"އިންޑިއާސް ބެސްޓް ޑާންސާ 4" ގެ ޖަޖުންގެ ޕެނެލުން ކަރިޝްމާ އަށް ފުރުސަތު ލިބުނު އިރު، އޭނަ މި ޝޯގެ ކުރީގެ ސީޒަންތަކުގައި މެހުމާނެއްގެ ގޮތުގައި ބައިވެރިވެފައިވެ އެވެ. އަދި ސްޓާ ޕްލަސްގެ ޑާންސް ޝޯ "ނަޗް ބަލިޔޭ" ގެ ސީޒަން ހަތަރެއްގެ ޖަޖްކަން ކޮށްފައިވެ އެވެ.
ބެލެވޭ ގޮތުން "އިންޑިއާސް ބެސްޓް ޑާންސާ 4" ޕްރީމިއާކުރާނީ އަންނަ މަހުގެ ފަހުކޮޅު އެވެ. މި ޝޯގެ ތިން ވަނަ ސީޒަން ގެނެސްދިނީ މިދިޔަ އަހަރު އެވެ.
އުމުރުން މިހާރު 49 އަހަރުގެ ކަރިޝްމާ އަކީ އޭނަގެ ރަންޒަމާނުގައި އެކްޓިންގެ އިތުރަށް ނެށުމަށް ވެސް މޮޅު ބަތަލާއެއްގެ ގޮތުގައި ފާހަގަ ކުރެވުނުނު ބަތަލާއެކެވެ. މަޝްހޫރު ބަތަލާ ކަރީނާ ކަޕޫރްގެ ދައްތަގެ އެންމެ ފަހުގެ ފިލްމަކީ މި އަހަރުގެ މާޗްގައި ނެޓްފްލިކްސް އިން ޕްރީމިއާކުރި މިސްޓްރީ ތުރިލާ "މާޑާ މުބާރަކް" އެވެ.
ކާމިޔާބު އެތައް ފިލްމެއް ކުޅެފައިވާ ދެ ކުދިންގެ މަންމަ، ކަރިޝްމާ އަހަރުގެ ތެރޭގައި "ބްރައުން" ކިޔާ ވެބް ސީރީޒަކުން ވެސް ފެންނާނެ ކަމަށް ބެލެވެ އެވެ.