އިއްޔެ އަރަފާތުގައި ދިވެހި ހައްޖާޖީން ހޭދަކުރުމަށް ފަހު މުޒްދަލިފާގައި ރޭކޮށް މިއަދު މިނާ އަށް ދަތުރު ފަށާފައިވާ ކަމަށް ދިވެހި ހައްޖު މިޝަނުން ބުނެފި އެވެ.
ހައްޖު މިޝަނުނުން ބުނެފައިވާ ގޮތުގައި ހުރިހާ ހައްޖުވެރިންގެ ހާލު ވެސް ރަނގަޅެވެ. އަދި ކަންކަން އިންތިޒާމުވެފައި ހުރީ ހައްޖާޖީންނަށް ވަރަށް ބޮޑަށް ފަސޭހަ ވާ ގޮތަށެވެ.
މި އަހަރު ރާއްޖެ އިން 1،150 މީހުން ހައްޖަށް ދިޔަ އެވެ. ހައްޖަށް ދިޔަ މީހުންގެ ތެރެއިން 80 އަހަރުގެ އަންހެނަކު ނިޔާވެފައިވެ އެވެ. މި އަހަރު ރާއްޖެ އިން ހައްޖަށް ދިޔަ މީހުންގެ ތެރޭގައި ސަރުކާރުގެ ހަރަދުގައި ހައްޖަށް ގެންދިޔަ 50 މީހަކު ވެސް ހިމެނެ އެވެ.
ދިވެހި ހުރިހާ ހައްޖާޖީން ވެސް މި އަހަރު ހައްޖަށް ދިޔައީ ހައްޖު ކޯޕަރޭޝަންގެ ހަވާލުގަ އެވެ.
މި އަހަރު އަމީރުލް ހައްޖަކީ އެޑިއުކޭޝަން މިނިސްޓަރު ޑރ. އިސްމާއީލް ޝަފީއު އެވެ. ހައްޖުގެ އަޅުކަމުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވެސް ބައިވެރިވެވަޑައިގެންނެވި އެވެ.