ބައެއް ގެތަކުގައި ކުއްޔަށް ދިރިއުޅޭ މީހުން ފެން ބިލް ދައްކަމުން ދަނިކޮށް، ގޭގެ ވެރިފަރާތުގެ އެންގުމަށް ފެނުގެ ޚިދުމަތް މެދުކަނޑާލުމުގެ މައްސަލަތަކެއް ފެންމަތިވުމާ ގުޅިގެން ހިއުމަން ރައިޓްސް ކޮމިޝަން (އެޗްއާރުސީއެމް) އިން އެކަން ތަހުގީގު ކުރަން ފަށައިފި އެވެ.
އެ ކޮމިޝަނުން ނެރުނު ބަޔާނެއްގަ ބުނީ ފެނުގެ ގަވައިދުން ބިލް ދައްކަމުން ދަނިކޮށް ގޭގެ ވެރިފަރާތުގެ އެދުމުގެ މަތިން ފެން މީޓަރުގައި ކުންފުނީގެ ފަރާތުން ތަޅު އެޅުވުމުގެ މައްސަލަ އާއި ކުންފުންޏަށް އެންގުމަކާ ނުލައި ގޭގެ ވެރިފަރާތުން ފެން މީޓަރުގައި ތަޅުއަޅުވައި ޚިދުމަތް މެދުކަނޑާލުމުގެ މައްސަލަތަކެއް ކޮމިޝަނަށް ހުށަހަޅަމުންދާ ކަމަށެވެ.
އެހެންވެ އެ މައްސަލަތަކެއް ތަހުގީގުކުރަމުން އަންނަ ކަމަށާއިި މައްސަލަތަކުގައި ޝާމިލްވާ ފަރާތްތަކާއި ގުޅުން ހުރި އިދާރާތަކާ އެކު މަޝްވަރާކޮށްގެން ބައެއް މައްސަލަތަކުގައި ހައްލު ހޯދައި ދެވިފައިވާ ކަމަށް ވެސް އެޗްއާރްސީއެމުން ބުންޏެވެ.
ފެނުގެ ޚިދުމަތް މެދުކަނޑާލުމުން ކުޑަކުދިންނާއި އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުން ހިމެނޭހެން އެ ގެއެއްގައި ނުވަތަ ގޭބިސީއެއްގައި ދިރިއުޅޭ އެންމެންނަށް ނޭދެވޭ އަސަރު ކުރުމަކީ ވަރަށް ކަންބޮޑުވާ ކަމެއް ވެސް ކޮމިޝަނުން ބުންޏެވެ.
"ގާނޫނުއަސާސީގައި ބަޔާންކޮށްފައިވާ ގޮތުގެ މަތިން މެނުވީ އެއްވެސް ހައްގެއް އެއްވެސް މިންވަރަކަށް ނުހިފެހެއްޓޭނެ ކަމުގައި ދަންނަން." ބަޔާނުގައި ބުންޏެވެ.
އެޗްއާރްސީއެމުން ބުނީ އާންމު ފަރުދުންގެ މެދުގައި އާއި އާންމު ފަރުދުންނާއި އިދާރާތަކާ ދެމެދުގައި ދިމާވާ މައްސަލަތަކުގައި ކަނޑައަޅާފައިވާ ގޮތުގެ މަތިން ގުޅުންހުރި އިދާރާއަކަށް އެ މައްސަލައެއް ހުށަހެޅުމަށާއި ގާނޫނީ އިމުގެ ތެރެއިން ހައްލު ހޯދުމަށް އެންމެންނަށް ވެސް އިލްތިމާސް ވެސް ކުރާ ކަމަށެވެ.
ރާއްޖޭގައި ފެނުގެ ހިދުމަތް ދެމުން އަންނަނީ އެމްޑަބްލިއުސްސީ އާއި ފެނަކަ އިންނެވެ.