އަހަރެއްވީ އަންހެން ދަރިޔަކު އޮތް އިންޑިއާގެ މަޝްހޫރު ބަތަލާ އާލިއާ ބަޓް ކުޑަކުދިންނަށް ހާއްސަކޮށްގެން ނެރެން ނިންމި ވާހަކަ ސީރީޒްގެ ފުރަތަމަ ވާހަކަ މިއަދު ނެރެފި އެވެ.
އެ ވާހަކަ އަށް ކިޔަނީ "އެޑް ފައިންޑްސް އަ ހޯމް" އެވެ. "އެޑް" އެ ނަމަކީ ކުޑަކުދިންނަށް ހާއްސަކޮށްގެން އާލިއާ ނެރެމުން އަންނަ ހެދުން ކަލެކްޝަން ބްރޭންޑް "އެޑް-އަ-މަމާ" އާ ގައި ވެސް ބޭނުން ކުރަމުން އަންނަ ޓްރޭޑްމާކް ނަމެވެ.
މުޅިން އާ މަސައްކަތެއްގެ ފެށުމާ ގުޅޭ ގޮތުން އެކްޓަރު ރަންބީރް ކަޕޫރްގެ އަންހެނުން ސޯޝަލް މީޑިއާގައި މިއަދު ބުނީ އޭނަގެ މި ވާހަކަ ސީރީޒް އަށް ވާހަކަ ލިޔުންތެރިިންނާއި އިލަސްޓްރޭޓަރުންގެ އެހީތެރިކަމާއި ހިޔާލު ވެސް ލިބެމުން އަންނަ ކަމަށެވެ. އެގޮތުން "އެޑް ފައިންޑްސް އަ ހޯމް" ގައި ހިމެނޭ ކުރެހުންތައް ތައްޔާރުކޮށްފައި ވަނީ ތަންވީ ބަޓެވެ.
އާލިއާ ބުނީ މި ވާހަކަ ފޮތް މިހާރު އިންޑިއާގައި ފޮތް ވިއްކާ ގިނަ ފިހާރަތަކުންނާއި އޮންލައިންކޮށް ވެސް ގަނެވޭނެ ކަމަށެވެ.
އިންޑިއާގެ މިހާރުގެ ކާމިޔާބު އަދި ހުނަރުވެރި ބަތަލާއިންގެ ތެރޭގައި ހިމެނޭ އާލިއާ ބުނީ އޭނަ ބޮޑުވަމުން އައީ ވެސް ވާހަކަތަކުގެ ތެރޭގައި ކަމަށާއި އެހެންވެ ކޮންމެވެސް ދުވަހަކުން އަމިއްލަ އަށް ކުޑަކުދިންގެ ވާހަކަ ނެރުމަކީ ދެކެމުން އައި ހުވަފެނެއް ކަމަށެވެ.
އަމިއްލަ ފެޝަން ލޭބަލެއް ހިންގަމުން އަންނަ ބަތަލާ ކުޑަކުދިންގެ ވާހަކަ ސީރީޒެއް ނެރެން ފެށި އިރު، އާލިއާ އަކީ އިޓާނަލް ސަންޝައިންގެ ނަމުގައި އަމިއްލަ ފިލްމު ކުންފުންޏެއް ވެސް ހިންގަމުން އަންނަ ތަރިއެކެވެ. އެގޮތުން އޭނަ ޕްރޮޑިއުސްކޮށް ކުޅުނު ދެވަނަ ފިލްމު "ޖިގްރާ" މި އަހަރުގެ އޮކްޓޯބަރު 11 ގައި ސިނަމާތަކަށް ގެންނާނެ އެވެ.