ބޮޑު އީދާ ގުޅިގެން އައްޑޫގައި ހިންގާ ހަރަކާތްތަކުގެ ތެރޭގައި އީދުގެ ހުރުމަތް ކެނޑޭ ފަދަ ހަރަކާތްތައް ރާވައި ހިންގާތީ އައްޑޫގެ ޖަމިއްޔާއަކުން އެކަން ކުށްވެރިކޮށްފި އެވެ.
އެގޮތުން މިއުޒިކް ޝޯ ފަދަ ހަރަކާތްތައް ބާއްވާތީ ފޭދޫ މިޝްކާތު ފައުންޑޭޝަނުން ނެރުނު ބަޔާނެއްގައި ބުނީ ޢީދުގެ އުފާފާޅުކުރުން ގައުމީ ފެންވަރުގަ އާއ، ސިޓީ ފެންވަރުގަ އާއ، އަވަށު ފެންވަރުގައި ކުރިއަށް ގެންދިއުމަކީ އެކަމަށް ތަރުޙީބު ދެވޭ ވަރަށް ރަނގަޅު ކަމެއް ކަމަށެވެ.
އެހެންވެ ޢީދު ފަދަ ދީނީ ބޮޑު މުނާސަބަތެއްގައި އުފާ ފާޅުކުރުމަށް ރާވައި އިންތިޒާމު ކުރެވޭ ކަންތައްތައް އެއީ އިސްލާމީ ތަރަޙައިގެ ތެރޭގައި އިންތިޒާމު ކުރެވޭ ކަންތައްތަކަށް ވާން ޖެހޭނެ ކަމަށް ވެސް މިޝްކާތު ފައުންޑޭޝަނުން ބުންޏެވެ. އަދި އެއީ ޝަރުޢީ މިންގަނޑުތަކާއ، ދީނީ އުޞޫލުތަކާއ،ި ދިވެހީންގެ ޢާންމު އިޖުތިމާޢީ މިންގަޑުތަކާ އެއްގޮތަށް ކުރިއަށް ގެންދާ ޙަރަކާތްތަކަކަށް ވެސް ޖެހޭނެ ކަމަށް ބުންޏެވެ.
ނަމަވެސް ޢީދުގެ އުފާ ފާޅުކުރުމުގައި މިއުޒިކާއި ބޮޑުބެރު ޝޯތަކާއި ނެށުމާއ، ދެ ޖިންސު މަސްހުނިވެ ކުޅޭ ކުޅިވަރުތަކަކީ މުންކަރާތުގެ ތެރޭގައި ހިމެނޭ ކަންކަން ކަމަށާއި ވަކިން ޚާއްސަކޮށް ޢީދު ފަދަ މާތް ދުވަސްތަކެއްގައި އެފަދަ ކަންކަން އިންތިޒާމުކުރުމަކީ އޭގެ ނުބައިކަން ވަކިން ބޮޑުވާނެ ކަމެއް ވެސް ކަމަށް މިޝްކާތު ފައުންޑޭޝަނުން ބުންޏެވެ.
"ސަބަބަކީ މާތް ބަރަކާތްތެރި ދުވަސްތަކެއްގެ ޙުރުމަށް ކަނޑާލުމުގެ ފާފައަށް ވެސް އަރައިގަނެވީ. އަދި ދީނީ މުނާސަބަތެއްގައި އުފާ ފާޅުކުރުމުގައި ޝަރުޢީ އަސާސްތައް މުގުރާލުމަކީ ދީނަށް ފުރައްސާރަ ކުރުމުގެ ކަމަކަ ވުމުގެ ބިރު ވެސް އެބައޮތް." ބަޔާނުގައި ބުންޏެވެ.
މިޝްކާތު ފައުންޑޭޝަނުން ފާހަގަކޮށްފައިވާ ގޮތުގައި ޢީދު ފަދަ ދީނީ ބޮޑު މުނާސަބަތެއްގައި އުފާ ފާޅުކުރުމަށް ރާވައި އިންތިޒާމުކުރެވޭ ކަންތައްތައް އެއީ އިސްލާމީ ތަރަޙައިގެ ތެރޭގައި އިންތިޒާމު ކުރެވޭ ކަންތައްތަކަށް ވާން ޖެހޭނެ އެވެ.
"އަޟްޙާ ޢީދަކީ އިސްލާމްކަމުގެ ފަސްވަނަ ރުކުނާއި ވިދިގެން އަންނަ އަޅުކަމުގެ މަތިވެރި މުނާސަބަތެއް. ޢީދާއި ޢީދުގެ ދުވަސްތަކަކީ ތަކްބީރުގެ ދުވަސްތަކެެއް. ޙުރުމަތްތެރިވެގެންވާ ދުވަސްތަކެެއް. ވ.ެ ކެއިން ބުއިމާއި އުފާ ފާޅުކުރުމުގެ ދުވަސްތަކެއް." ބަޔާނުގައި ބުންޏެވެ.
އައްޑޫގައި ކުލަގަދަކޮށް އީދު ފާހަގަކުރަން އައްޑޫ ސިޓީ ކައުންސިލުން "އައްޑޫ އީދި ސަމާ 1445" ގެ ނަމުގައި އިއްޔެ އިން ފެށިގެން މި މަހުގެ 22 އާ ހަމައަށް ތަފާތު ގިނަ ހަރަކާތްތައް ހުރިހާ އަވަށްތަކެއްގައި ހިންގަން އޮތީ ރާވައިފަ އެވެ. އެގޮތުން ދެ ޖިންސް ބައިވެރިވާ ތަފާތު ކުޅިވަރު މުބާރާތްތައް ހިމެނެ އެވެ.
ކައުންސިލުން ކުރިއަށް ގެންދާ އީދު ހަރަކާތްތައް މި މަހުގެ 22 ވަނަ ދުވަހުގެ ރޭ ނިންމައިލަން ހަމަޖެހިފައި އޮތީ މިއުޒިކް ޝޯއަކުންނެވެ. އަދި ފޭދޫގެ ބަޔަކު އިންތިޒާމިކޮށްގެން އެ އަވަށުގައި ވެސް މިރޭ މިއުޒިކް ޝޯއެެއް ބާއްވަން ހަމަޖެހިފައިވެ އެވެ.
މިފަދަ ހަރަކާތްތަކާ ގުޅިގެން މިޝްކާތު ފައުންޑޭޝަމުން ކަންބޮޑުވުން ފާޅުކޮށް ބަޔާނެއް ނެރުނު އުިރު، އީދު އައުމުގެ މާ ކުރިން ވެސް އައްޑޫގެ ބައެއް ޝެއިހުން ވަނީ އީދުގެ ހުރުމަތް ކެނޑޭ ގޮތަށް އެއްވެސް ހަރަކާތެއް ނުހިންގަން ގޮވާލައްވަފައި އެވެ.
ސަރުކާރުން ވެސް މުޅި ރާއްޖެ އަށް އެކަމަށް އިލްތިމާސްކޮށް ބަޔާނެއް ނެރެފައިވެ އެވެ.