ފާއިތުވި ދެ ދުވަހު މާލެ ސަރަހައްދުގައި މާރާމާރީތައް ހިންގާފައި ވަނީ ދެ ގްރޫޕަކުން ކަމަށް ފުލުހުން ބުނެފި އެވެ.
ފުލުހުންގެ ތަރުޖަމާނު އެސިސްޓެންޓް ޕޮލިސް ކޮމިޝަނަރު އަހުމަދު ޝިފާން ވިދާޅުވީ މާލެ އާއި ހުޅުމާލޭގައި ހިންގި މާރާމާރީތަކުގެ މައްސަލަ މިހާރު ތަހުގީގު ކުރަމުން އަންނަ ކަމަށެވެ. އަދި އެ ހާދިސާތަކާ ގުޅިގެން އިތުރަށް ބަލަން ޖެހޭ ކަންކަން ބަލަމުން އަންނަ ކަމަށް ވެސް ވިދާޅުވި އެވެ.
ޝިފާން ވިދާޅުވީ އެ މާރާމާރީތަކަކީ ކުށްކުރާ ދެ ގްރޫޕެއްގެ ދެމެދުގައި ހިނގި މާރާމާރީތަކެއް ކަމަށެވެ. އަދި ކުރިޔަށް އޮތް ތަނުގައި އެކަން ތަކުރާރުވިޔަ ނުދިނުމަށް އަޅަން ޖެހޭ ފިޔަވަޅުތައް އެޅުމުގެ މަސައްކަތް ވެސް ފުލުހުން ކުރަމުން އަންނަ ކަމަށް ވިދާޅުވި އެވެ.
ފުލުހުން ބުނީ ރޭ 10:30 ހާއިރު ދަރުބާރުގޭ ކައިރީގައި މާރާމާރީ ހިންގުމުގެ ސަބަބުން އަނިޔާވި މީހާއަށް ސެނެހިޔާ ހޮސްޕިޓަލުގައި ފަރުވާ ދީފައިވާ ކަމަށެވެ. އޭނާގެ ހާލު ސީރިއަސް ނޫން ކަމަށް ފުލުހުން ބުންޏެވެ.
މާލޭގައި ހިންގި ދެ މާރާރީއަކާއި ހުޅުމާލޭގައި ހިންގި މާރާމާރީއަކާ ގުޅިގެން ފުލުހުން ވަނީ ފަސް މީހަކު ހައްޔަރުކޮށްފަ އެވެ. އަދި އެ މީހުން މިހާރު ތިބީ ޝަރީއަތް ނިމެންދެން ބަންދުގަ އެެވެ. މާލޭގައި އިއްޔެ ރޭ މާރާމާރީއާ ގުޅިގެން ހަތަރު މީހަކު ހައްޔަރުކުރި އިރު، ހުޅުމާލޭގައި މާރާމާރީ ހިންގުމުގައި ޝާމިލުވި އެކަކު ފިލައިގެން އުޅޭތި އޭނަ ހޯދުމުގެ މަސައްކަތް ފުލުހުން އަންނަނީ އިއްޔެ މެންދުރުން ފެށިގެން ކުރަމުންނެވެ.
މީގެ ކުރިން ވެސް މާލޭގައި ގްރޫޕް މާރާމާރީތައް ހިންގައި، ބައެއް މީހުންގެ ފުރާނަ ވެސް ދުއްވާލާފައިވެ އެވެ. އަދި ރާއްޖޭގެ ބައެއް އެހެން ހިސާބުތަކުގައި މާރާމާރީ ހިންގުމުގެ މައްސަލަތައް ދޭތެރެ ދެތެރެ އިން ވަރަށް ބޮޑަށް އިތުރުވެ އެވެ.