ގައުމީ ފެންވަރުގައި މި އަހަރުގެ ބޮޑު އީދު ފާހަގަ ކުރަމުން އަންނަ ރަށްތަކުގެ ތެރޭގައި ހިމެނޭ ދ. ކުޑަހުވަދޫގައި ފަލަސްތީންގެ ރައްޔިތުންގެ ހައްގުގައި ހިނގާލުމެއް ބާއްވަން ނިންމައިފި އެވެ.
މި ހިނގާލުން ކުރިއަށް ގެންދަން ހަމަޖެހިފައި ވަނީ ހަވީރު 4:30-5:30 އަށެވެ. އެހެންވެ ކުޑަހުވަދޫ ކައުންސިލުން ވަނީ އެ ހަރަކާތުގެ ރަށުގެ ހުރިހާ ރައްޔިތުންނާއި އީދަށް އެ ރަށަށް ދިޔަ މެހުމާނުން ވެސް ހިނގާލުމުގައި ބައިވެރިވާން އެދިފަ އެވެ.
ފަލަސްތީނަށްޓަކައި ބާއްވާ ހިނގާލުމާ ބެހޭ ގޮތުން ކުޑަހުވަދޫ ކައުންސިލުން ބުނީ މި ހަރަކާތް ވާނީ ރާއްޖޭގެ ރަށެއްގައި ފަލަސްތީނުގެ ހައްގުގައި ބާއްވާނެ އެންމެ ބޮޑު ހަރަކާތަށް ކަމަށެވެ. އެގޮތުން މި ހިނގާލުމުގެ ތެރޭގައި ފަލަސްތީނަށް އެހީވާން ފައިސާ އެއްކުރުމުގެ ހަރަކާތްތަކެއް ވެސް ކުރިއަށް ގެންދަން އޮތީ ނިންމައިފަ އެވެ.
ރަށުގައި އިއްޔެ ހިންގި ހަރަކާތްތަކުގެ ތެރޭގައި ވެސް ފަލަސްތީނަށް އެހީވާން ފައިސާ ހަދިޔާކުރަން ފަންޑް ފޮއްތެއް ބެހެއްޓި އެވެ.
ކައުންސިލުން ބުނީ ފަލަސްތީން ރައްޔިތުންގެ ހައްގުގައި ހިނގާލުމެއް ބޭއްވުމުގެ އެންމެ ބޮޑު މަގުސަދަކީ އަޟްހާ އީދުގެ މުނާސަބާ ފާހަގަކުރުމުގެ ތެރޭގައި ވެސް ފަލަސްތީނުގެ މުސްލިމު ރައްޔިތުންނާ އެކީ ރައްޔިތުން ތިބިކަން، ޖުމްލަކޮށް ހުރިހާ ދިވެހި ހުރިހާ ރައްޔިތުން ތިބިކަން ދައްކުވައި ދިނުމެވެ.
މިދިޔަ ހަފުތާގައި ވަނީ ރާއްޖޭގައި ވަނީ ފަލަސްތީނަށް އެހީވާން ޓެލެތޯނެއް ވެސް ބާއްވައިފަ އެވެ.
ފަލަސްތީނާ އެކި އަބަދު ވެސް ދިވެހިން ތިބިކަން ހާމަކޮށް ދިނުމުގެ ގޮތުން މީގެ ކުރިން ވެސް ތަފާތު ގިނަ ހަރަކާތްތަކެއް ރާއްޖޭގެ އެކި ހިސާބުތަކުގައި ހިންގާފައިވެ އެވެ.