ކަރީނާ ކަޕޫރާއި އަޔޫޝްމަން ކްރާނާ ހިމަނައިގެން ޑައިރެކްޓަރު މެގްނާ ގުލްޒާރު ފިލްމެއް ހެދުމުގެ ތައްޔާރީތައްވަމުން އަންނަ ކަމަށް ރިޕޯޓްތައް ބުނެފި އެވެ.
ޕިންކްވިލާ އިން މިއަދު ބުނީ މި އަހަރުގެ ފަހުކޮޅު ޝޫޓިން ފަށަން ހަމަޖެހިފައިވާ މި ފިލްމަކީ އިންޑިއާގެ ހައިދަރުއާބާދުގައި ހިންގި ރޭޕްގެ ހާދިސާއެއްގައި ޝާމިލުވާ ބަޔަކު ފުލުހުންގެ ބެލުމުގެ ދަށަށް ގެންގޮސް، ފުލުހުން އެ މީހުން މަރައިލި ކަމަށް ތުހުމަތުކުރާ މައްސަލަގަނޑަށް ބިނާކޮށް ހަދަން ހަމަޖެހިފައިވާ ފިލްމެއް ކަމަށެވެ.
އާންމުކޮށް ހަގީގީ ހާދިސާތަކަށް ބިނާކޮށް ފިލްމު ހަދާ މެގްނާގެ އާ ފިލްމުގެ ނަމަކީ "ދާއިރާ" ކަމަށާއި މިއާ ގުޅުން ހުރި ހުރިހާ ކަމެއް ކުރިއަށް އޮތް ދެ ހަފުތާގެ ތެރޭގައި ފައިނަލްް ކުރާނެ ކަމަށް ވެސް އެ ނޫހުން ބުންޏެވެ.
"ތަލްވާރު" އާއި "ރާޒީ" އަދި "ޗަޕާކް" ފަދަ ސީރިއަސް ފިލްމުތަކެއް ގެނެސްދިން މެގްނާގެ އެންމެ ފަހުގެ ފިލްމަކީ މިދިޔަ އަހަރު ވިކީ ކޯޝަލާ އެކީ ގެނެސްދިން ބައޮގްރަފިކަލް ހަނގުރާމަ ފިލްމު "ސޭމް ބަހާދޫރް" އެވެ. މެގްނާ އަކީ ކުރީގެ މަޝްހޫރު ބަތަލާ ރާކީ އާއި ކުޅަދާނަ ޅެންވެރިޔާ ގުލްޒާރުގެ ހަމައެކަނި ދަރިފުޅެވެ.
އަންނަ އަހަރު ސިނަމާތަކަށް ގެންނަން އަމާޒު ހިފާފައިވާ "ދާއިރާ" ވާނީ ކަރީނާ އާއި އަޔޫޝްމަން އެކީގައި ފިލްމެއް ކުޅޭ ފުރަތަމަ ފަހަރަށެވެ. އަދި ދެ ތަރިން ވެސް މެގްނާއާ އެކީ މަސައްކަތް ކުރާ ފުރަތަމަ ފިލްމަށެވެ.