ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރުމުގެ މަސައްކަތް ނެޝަނަލް ޕޭ ކޮމިޝަނުން ފަށައިފި އެވެ.
ދައުލަތުގެ މީޑިއާ، ޕީއެސްއެމްގައި ލޯކަލް ގަމާވެމެންޓް މިނިސްޓަރު އާދަމް ޝަރީފް ވިދާޅުވީ ކައުންސިލްތަކުގެ ދަރަޖަ 3 އިން 4 އަށް ބަދަލުކޮށްފައިވާ ކަމަށާއި އެ ބަދަލާއެކު މުވައްޒަފުންގެ މުސާރައަށް ވެސް ބަދަލުތަކެއް އަންނާނެ ކަމަށެވެ. އެގޮތުން މިހާރު ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރުމާ ގުޅޭ މަސައްކަތްތައް ޕޭ ކޮމިޝަނުން ކުރަމުން އަންނަ ކަމަށް ވިދާޅުވި އެވެ.
"ދަރަޖަ ބަދަލުވުމާއެކު، ޕޭ ކޮމިޝަނުން ގެންނަން ކަނޑައަޅާ ބަދަލުތައް ސަރުކާރުކާރަށް ހުށަހެޅުމަށް ދަނީ ތައްޔާރުވަމުން. ޢީދު ހަފްތާ ނިމުނީމަ ވުޒާރާއިން ޕޭ ކޮމިޝަނާ ބައްދަލުކޮށް، އެބޭފުޅުން ސަރުކާރަށް ހުށައަޅާ ކަންކަމާ ގުޅޭގޮތުން މަޝްވަރާ ކުރާނަން،" މިނިސްޓަރު ވިދާޚުވި އެވެ. "ކައުންސިލްތަކަށް ކުރިއެރުންތައް ލިބޭނެކަން ކަށަވަރު ކުރާނަން،"
ކައުންސިލްތައް ހިންގުމުގައި އެންމެ ބޮޑު ދައުރެއް އަދާކުރާ ބަޔަކީ އިދާރީ މުވައްޒަފުން ކަމަށާއި ނަމަވެސް މިހާތަނަށް އެ މުވައްޒަފުންނަށް މާ ބޮޑު އަހަންމިއްޔަތުކަމެއް ނުދެވޭ ކަމަށް ވެސް މިނިސްޓަރު ވިދާޅުވި އެވެ.
ކައުންސިލްތަކުގެ އިދާރީ މުވައްޒަފުން ހިމެނޭހެން ސަރުކާރުގެ ހުރިހާ މުވައްޒަފުންނަށް މި އަހަރުގެ ޖެނުއަރީން ފެށިގެން ބޮޑު މުސާރަ ދިނުމަށް ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ނިންމި އެވެ. އެކަން ފަސްކުރީ ޑރ. މުހައްމަދު މުއިއްޒުގެ ސަރުކާރުންނެވެ.