އޮގަސްޓް މަހު ރިލީޒްކުރަން އޮތްް ތެލެގޫ އެކްޓަރު އައްލޫ އަރުޖުން "ޕުޝްޕާ 2: ދަ ރޫލް" މި އަހަރުގެ ޑިސެމްބަރަށް ފަސްކޮށްފި އެވެ.
އަހަރުގެ އެންމެ ފަހު މަހުގެ 6 ގައި ސިނަމާތަކަށް ފިލްމު ގެންނަ ގޮތަށް ފަސްކުރި އިރު، ކުރިން ފިލްމު ބެލުންތެރިންނަށް ދޫކޮށްލަން ތާވަލުކޮށްފައި އޮތީ އޮގަސްޓް މަހުގެ 15 ގަ އެވެ. ނަމަވެސް "ޕުޝްޕާ 2" އަށް ކުރަން ޖެހޭ އިންތިޒާރު މިހާރު މި ވަނީ ވަރަށް ބޮޑަށް ދިގުލައިގެން ގޮސްފަ އެވެ.
މި ފިލްމަކީ ގިނަ ބަޔަކު އެންމެ ބޮޑަށް މި އަހަރު އިންތިޒާރު ކުރާ އިންޑިއާގެ ފިލްމެކެވެ. ސަބަބަކީ 2021 ގެ "ޕުޝްޕާ" އަކީ ވަރަށް ކާމިޔާބު ފިލްމަކަށްވެފައި، ދެވަނަ ބައި ބަލާލުމުގެ ޝައުގުވެރިކަން އިންތިހާ އަށް ބޮޑުވުމެވެ.
ސުކުމާރު ޑައިރެކްޓްކޮށް ގެނެސްދޭ "ޕުޝްޕާ 2" ގައި ވެސް ފުރަތަމަ ބައިގެ މުހިއްމު ކާސްޓުން ހިމެނޭނެ އެވެ. އެގޮތުން އައްލޫއާ އެކީ މި ފަހަރު ބަތަލާގެ ރޯލުން ފެންނާނީ ރަޝްމިކާ މަންދަނާ އެވެ. ރިޕޯޓްތައް ބުނާ ގޮތުން މި ފިލްމުގެ އައިޓަމް ލަވައަކުން މި ފަހަރު ބޮލީވުޑްގައި މި ފަހުން ވިދުން ގަދަކުރި ބަތަލާ، ޓްރިޕްތީ ދިމްރީ އެވެ.
"ޕުޝްޕާ 2" ޑިސެމްބަރަށް ފަސްކުރި އިރު، ކުރިން އޮގަސްޓް 15 ގައި ރިލީޒްކުރަން އޮތް އަޖޭ ދޭވްގަންގެ "ސިންގަމް އެގެއިން" ވަނީ ނޮވެމްބަރުގައި ފާހަގަކުރާ ދިވާލީ އަށް ފަސްކޮށްފަ އެެވެ. އެ ދެ ފިލްމުގެ ތާރީހުތަކަށް އައި ބަދަލާ އެކީ މިހާރު އޮގަސްޓް 15 ގައި ސިނަމާތަކަށް އަންނަނީ ޝްރަދާ ކަޕޫރާއި ރާޖްކުމާރު ރާއޯގެ "އިސްތިރީ 2" އާއި އަކްޝޭ ކުމާރުގެ "ކޭލް ކޭލް މޭ" ގެ އިތުރުން ޖޯން އަބްރަހަމްގެ "ވޭދާ" އެވެ.