ގިނަ އަދަދެއްގެ ކެނެބިސް ގެންގުޅުނު މީހަލު 25 އަހަރަށް ޖަލަށްލައި، 100،000ރ. އިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފިއެވެ.
އެ ހުކުމް އިއްވާފައި ވަނީ މާލެ، މ. އިރާކުމާގެ މުޙައްމަދު ލަމްޢާން ޞަބާހްގެ މައްޗަށެވެ.
އޭނަގެ މައްޗަށް ދައުލަތުން ހުށަހެޅި ދައުވާގައި ވަނީ ހ. ދިއްގާމާގޭގެ ތިންވަނަ ފަންގިފިލާގައި މަސްތުވާތަކެތި ބޭނުންކޮށް، ވިޔަފާރިކުރާކަމުގެ އިންޓެލިޖެންސް މައުލޫމާތު ފުލުހުންނަށް ލިބުނު ކަމަށާއި އެކަމާ ގުޅިގެން މިދިޔަ އަހަރުގެ އޮގަސްޓު 31 ވަނަ ދުވަހުގެ ބުރުޒުމަގުގައި ހުންނަ ކޮފީކޯނާ ކައިރީގައި ލަމްޢާން ހުއްޓައި، ފުލުހުން ކޯޓު އަމުރެއްގެ ދަށުން އޭނާ ހައްޔަރުކުރި ކަމަށެވެ.
އަދި ދިއްގާމާގޭގެ ތިންވަނަ ފަންގިފިލާގައި ލަމްޢާން ދިރިއުޅޭ އެޕާޓްމެންޓްގައި ގާނޫނާ ޚިލާފަށް އެއްވެސް އެއްޗެއް ހުންނާނެތޯ ފުލުހުން ސުވާލު ކުރުމުން، އެ ކޮޓަރީގެ ކަބަޑުގައި މަސްތުވާތަކެތި ހުންނާނެ ކަމަށް އޭނާ ބުނެފައިވާކަމަށް ދައުވާގައިވެ އެވެ. އަދި ފުލުހުން އެ ތަން ބަލައި ފާސްކުރި އިރު، މަސްތުވާތަކެތި ކަމަށް ބެލެވޭ 225 ސެލޯފިންކޮޅު ފެނިފައިވާ ކަމަށާއި، އެ ސެލޯފިންކޮޅުތަކުގައި ޖުމްލަ 138.6 ގްރާމްގެ ކެނެބިސްހުރި ކަމަށް ބުނެފައިވެ އެވެ.
އެހެންވެ ދައުލަތުން ލަމްޢާނުގެ މައްޗަށް ކުރީ ކެނެބިސް ޓްރެފިކް ކުރުމުގެ ދައުވާއެވެ.
ނަމަވެސް ދައުވާ އަށް އޭނާ ކޯޓުގައި އިންކާރުކޮށް ބުނެފައިވަނީ އެއީ އޭނަގެ އަންހެނުންގެ ބޭބެ ބަހައްޓާފައިވާ ތަކެތި ކަމަށެވެ.
މި މައްސަލައިގައި ލަމްޢާނުގެ އިތުރުން ދައުލަތުގެ ފަރާތުން ހުށަހެޅި ހެކިތަކަށް ރިޢާޔަތްކުރުމަށްފަހު، ލަމްޢާންގެ ކޮޓަރިން ފެނުނު މަސްތުވާތަކެއްޗަކީ އޭނާ ބަހައްޓާފައިވާ ތަކެތި ކަމަށް ޝައްކެއް ނެތި ދައުލަތުން ސާބިތުކޮށްދީފައިވާތީ، ޝަރީއަތުން ކަނޑައެޅީ ލަމްޢާނުގެ މައްޗަށް ދައުވާ ސާބިތުވާ ކަމަށެވެ.
ކްރިމިނަލް ކޯޓުން ލަމްޢާނުގެ މައްޗަށް ހުކުމްކުރީ 25 އަހަރަށް ޖަލަށްލުމަށާއި 100،000ރ. އިން ޖޫރިމަނާކޮށް، އެ ފައިސާ މި މަހުގެ 13 ވަނަ ދުވަހުން ފެށިގެން 12 މަސްދުވަހުގެ ތެރޭގައި މޯލްޑިވްސް އިންލެންޑް ރެވެނިއު އޮތޯރިޓީ މީރާ) އަށް ދެއްކުމަށެވެ.