ބިދޭސީ މަސައްކަތްތެރިންނަށް ކޮންމެ ރަށަކުން އިތުރު ޕާމިޓެއް ދޭން ޖެހޭ ގޮތް ހަދަން ނިންމައިފި އެވެ.
މިކަމާ ގުޅޭ ގޮތުން ހޯމްލޭންޑް މިނިސްޓަރު އަލީ އިހުސާން ދައުލަތު މީޑިއާ ޕީއެސްއެމަށް ވިދާޅުވީ މިއީ ގަވާއިދާ ހިލާފަށް އުޅޭ ބިދޭސީންގެ މައްސަލަ ޙައްލު ކުރުމަށް ސަރުކާރުން ކުރަމުން އަންނަ މަސައްކަތްތަކުގެ ދަށުން ކުރަން ނިންމާފައިވާ ކަމެކެވެ.
އިހުސާން ވިދާޅުވީ ޤާނޫނުގެ ދަށުން ކައުންސިލްތަކުން އެ ރަށެއްގައި އުޅޭ ބިދޭސީންގެ މައުލޫމާތު ބަލަހައްޓަން ޖެހުނު ނަމަވެސް އެފަދަ ނިޒާމެއް މިހާރު ނެތް ކަމަށެވެ. އެހެންވެ މިހާރު ސަރުކާރުން މިދިޔަ މަހުގެ ތެރޭގައި ފެށި "ކުރަނގި" އޮޕަރޭޝަންގެ ދަށުން ބިދޭސީންގެ ބަޔޯމެޓްރިކް ޑޭޓާ ނެގުމަށް ފަހު އެ ސިސްޓަމްގެ އެކްސެސް ކައުންސިލްތަކަށް ދީ މައުލޫމާތު އަޕްޑޭޓް ކުރުމުގެ ފުރުސަތު ދޭނެ ކަމަށް ވެސް ވިދާޅުވި އެވެ.
"އަޅުގަނޑުމެން އެބަ މެންޑޭޓްކުރަން، އަޅުގަނޑުމެން ވޯކް ޕާމިޓެއް ރާއްޖޭގައި މަސައްކަތްކުރަން ދިނަކަސް އަދި އޭގެ އިތުރު ޕާމިޓެއް، އެ ރަށަކުން އިޝޫ ކުރަން ޖެހޭނެއޭ އޭނަ އެ ރަށެއްގައި މަސައްކަތް ކުރުމަށްޓަކައި،" މިނިސްޓަރު ވިދާޅުވި އެވެ. "އޭރުން ދަފުތަރު [ރަނގަޅަށް] ބެލެހެއްޓޭނީ."
ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުކޮށް، ރާއްޖޭގައި އުޅޭ ހުރިހާ ބިދޭސީންގެ މައުލޫމާތު އެއްކުރަން ފެށި "ކުރަނގި" އޮޕަރޭޝަން މިހާރު ދެ ރަށެއްގައި ވަނީ ހިންގައިފަ އެެވެ. އެއީ ކ. ހިންމަފުއްޓާއި މާފުށީފަ އެވެ. އަދި މި ޕްރޮގްރާމް އިތުރު ފަސް ދިމާއެއްގައި ފެށުމަށް އަންނަނީ ތައްޔާރުވަމުންނެވެ.
ސަރުކާރުން ވަނީ ގަވާއިދާ ޚިލާފަށް އުޅޭ ބިދޭސީންގެ މައްސަލަ 3 އަހަރު ދުވަހުގެ ތެރޭގައި ޙައްލުކުރަން އަމާޒު ހިފައިފަ އެވެ.