މިދިޔަ އަހަރު ޝާހްރުކް ޚާނާ އެކީ "ޖަވާން" ގެނެސްދިން ތަމަޅަ ޑައިރެކްޓަރު އެޓްލީގެ އާ ފިލްމު ހަދަން ނިންމާފައި ވަނީ ސަލްމާން ޚާނާ އެކީ ކަމަށް ރިޕޯޓްތައް ބުނެފި އެވެ.
މީޑިއާތަކުން ބުނީ އެކަމާ ބެހޭ ގޮތުން އެ ދެ މީހުން މަޝްވަރާތަކެއް ވެސް ކޮށްފައިވާ ކަމަށެވެ. އެގޮތުން ޕްލޭން ކުރަމުން އަންނަނީ އަންނަ އަހަރުގެ މެދުތެރޭގައި ފިލްމުގެ ޝޫޓިން ފެށުމަށް ކަމަށް މީޑިއާތަކުން ބުންޏެވެ. ނަމަވެސް މިއާ ބެހޭ އިތުރު އެއްވެސް ތަފުސީލެއް އަދި ނުލިބެ އެވެ.
ރިޕޯޓްތައް ބުނާ ގޮތުން ސަލްމާން އެންމެ ފަހުން ސޮއިކުރި ފިލްމު "ސިކަންދަރު" ގެ ޝޫޓިން މިއަދު ރަސްމީކޮށް މުމްބާއީގައި ފަށާނެ އެވެ. ސާޖިދު ނަދުއަދުވާލާ ޕްރޮޑިއުސްކުރާ މި ފިލްމަކީ އާމިރު ޚާނާ އެކީ 2008 ގެ "ގަޖިނީ" ގެނެސްދިން ތަމަޅަ ޑައިރެކްޓަރު އޭއާރް މުރްގަދޯސްގެ ފިލްމެކެވެ.
ދެކުނުގެ ޒުވާން ބަތަލާ ރަޝްމިކާ މަންދަނާ ބަތަލާގެ ރޯލު ކުޅޭ "ސިކަންދަރު" ސިނަމާތަކަށް ގެންނަން ނިންމާފައި ވަނީ އަންނަ އަހަރުގެ ފިތުރު އީދުގަ އެވެ.
މީޑިއާތަކުން ބުނީ ދެން ހަދާ ފިލްމު ސަލްމާނާ އެކީ ހަދަން އެޓްލީ ނިންމީ މަޝްހޫރު ތެލެގޫ އެކްޓަރު އައްލޫ އަރުޖުންއާ އެކީ ފިލްމެއް ހަދަން ކުރެވުނު މަޝްވަރާތަކުގައި ދެ މީހުންނަށް އެއްގަލަކަށް ނޭރި، އުފެދުނު ހިޔާލު ތަފާތުވުންތަކަކާ ގުޅިގެން، އެ ޕްރޮޖެކްޓް މި ވަގުތަށް ބާއްވަން ނިންމުމަށް ފަހު އެވެ.
އައްލޫގެ ކުރިއަށް އޮތް ފިލްމަކީ މިހާރު ޑިސެމްބަރު 6 އަށް ތާވަލުކޮށްފައިވާ "ޕުޝްޕާ 2: ދަ ރޫލް" އެވެ.
ޝާހްރުކާ އެކީ އެޓްލީ މިދިޔަ އަހަރު ގެނެސްދިން އެކްޝަން ތުރިލާ "ޖަވާން" އަކީ އަހަރުގެ އެންމެ ބޮޑު އެއް ހިޓެވެ.