ރާއްޖޭގައި ވިހާ ރޭޓް ދަށްވެ، އާބާދީ އިތުރުވަމުން ނުދާތީ ފެމިލީ މިނިސްޓަރު ޑރ. އައިޝަތި ޝިހާމް ކަންބޮޑުވުން ފާޅުކުރައްވައި އެވެ.
ދައުލަތުގެ މީޑިއާ ޕީއެސްއެމްގެ ޕްރޮގްރާމެއްގައި މިނިސްޓަރު ވިދާޅުވީ މިކަމާ ގުޅިގެން ގައުމީ ފެންވަރުގައި ވަރަށް އަވަހަށް މަޝްވަރާތަކެއް ވެސް ކުރަން ޖެހޭ ކަމަށެވެ.
މިނިސްޓަރު ވިދާޅުވީ އުފަންވާ ރޭޓް ދަށަށް ދިޔުމުގެ މައްސަލަ ދުނިޔޭގެ އެހެނިހެން ގައުމުތަކަށް ވެސް ކުރިމަތިވެފައިވާ ކަމަށާއި، އެފަދަ ގައުމުތަކުން މިހާރު އެކަމަށް ފިޔަވަޅުތަކެއް އަޅަމުން އަންނަ ކަމަށެވެ. އެގޮތުން އުފަންވާ ކުދިންނަށް އެކި ކަހަލަ ޢިނާޔަތްތައް ދެމުންގެންދާކަން ފާހަގަކުރައްވައި އައިޝަތު ވިދާޅުވީ ވަޒީފާ އަށް ދާ މީހުންގެ ކުދިން ބެލޭނެ އިންތިޒާމު ގައުމުތަކުގައި ހަރުދަނާ ކުރަމުން އަންނަކަމަށެވެ.
"ކުދިން ބެލެހެއްޓޭނެ އިންތިޒާމު ވަޒީފާއަށް ދާ ތަންތަނުގައި ހަރުދަނާ ގޮތެއްގައި ޤާއިމުކުރޭ އެބަ ޤގައުމުތަކުގައި. އެގޮތުން ވަޒީފާއަށް ދާ މައިންބަފައިންގެ ކުދިން ބެލުމުގެ ޒިންމާއަދާކުރެވޭނެ މަގުތައް އެބަ ފަހިވާން ޖެހޭ،" މިނިސްޓަރު ވިދާޅުވި އެވެ. "ރާއްޖޭގައި ވަރަށް އަވަހަށް މިކަމާ ގުޅިގެން ގައުމީ ފެންވަރުގައި މަޝްވަރާތަކަކަށް އެބަޖެހޭ ދާން މިކަމުގައި ޢަމަލުކުރާނެ ގޮތްތަކާ ގުޅޭ ގޮތުން."
އެންމެ ފަހުން 2022 ގައި ކުރިއަށް ގެންދިޔަ ބޯހިމެނުމުގެ ނަތީޖާ އަށް ރިއާޔަޔްކޮށް، މޯލްޑިވްސް ބިއުރޯ އޮފް ސްޓެޓިސްޓިކްސްއިން ބުނެފައިވާ ގޮތުގައި 2014 ގައި ބޯހިމެނި އިރު، ރާއްޖޭގެ އާބާދީ އަކީ 338،434 ގައެވެ. އަދި 2022 އަހަރުގެ ތަފާސްހިސާބުތަކުން ދައްކާ ގޮތުގައި އާބާދީ އަކީ 382،751 އެވެ.
އެހެންވެ އެންމެ ފަހުން ބޯހިމެނުން ކުރިއަށް ގެންދިއުމާ ދޭތެރޭގައި ދިޔަ އަށް ތެރޭގައި އާބާދީއަށް އިތުރުވީ 44،317 މީހުންނެވެ. އެއީ އެވްރެޖްކޮށް އަހަރަކު 5،500 ކުދިންނެވެ.
ރާއްޖޭގެ އާބާދީ އިތުރުވަމުން ނުދާތީ މި އަހަރުގެ ކުރީކޮޅު ފަސްޓްލޭޑީ ސާޖިދާ މުހައްމަދު ވެސް ކަންބޮޑުވުން ފާޅުކުރައްވާފައިވެ އެވެ.
ރާއްޖޭގެ މިހާރުގެ އާބާދީގެ ހާލަތާ ގުޅޭ ގޮތުން ފެބްރުއަރީ 27 ގައި ބޭއްވި "ޗޭންޖިން ޕޮޕިއުލޭޝަން ޑައިނަމިކްސްއިން މޯލްޑިވްސް" ގައި އެ ކަމަނާ ވިދާޅުވެފައި ވަނީ އާބާދީ އިތުރު ކުރަން ޖެހޭ ކަމަށާއި އެހެން ނޫން ކަމަށްވާ ނަމަ ގައުމީ ތަރައްގީ އަށް ވަރަށް ބޮޑަށް ހުރަހަކަށް ވާނެ ކަމަށެވެ.
ސާޖިދާ ވިދާޅުވެފައި ވަނީ ރާއްޖޭގައި އުފަންވާ ނިސްބަތް ދަށްވަމުންދާ މައްސަލައަށް ޙައްލު ގެނައުމަށް ހުރިހާ ފަރާތެއް ގުޅިގެން މަސައްކަތް ކުރަން ޖެހޭ ކަމަށެވެ. އެހެން ނޫން ނަމަ މީގެ 20 އަހަރު ފަހުން ރާއްޖޭގެ އިގުތިސާދީީ އިންޖީނު ހިންގުމަށް ވަޒީފާ އަދާކުރާނެ ވޯކް ފޯހެއް ނެތުމުގެ މައްސަލައާ ކުރިމަތިލާން ޖެހިދާނެ ކަމަށެވެ.
"ރާއްޖޭގެ އާބާދީގެ ހަތްދިހަ ޕަސެންޓަކީ މަސައްކަތްކުރާ އާބާދީ. މިއީ މިހާރު ވަރަށް ބޮޑު ކުރިއެރުމެއް ޤައުމީ ފެންވަރުގައި،" އެ ކަމަނާ ވިދާޅުވި އެވެ. "އެހެން ނަމަވެސް އުފަންވާ ކުދިންގެ ރޭޓަށް ބަލާއިރު ރާއްޖޭގެ މަސައްކަތްކުރާ އާބާދީ ބޮޑުތަކުން ކުޑަވެ ޤައުމީ ތަރައްގީ އަށް އޭގެ ނޭދެވޭ އަސަރު ކުރާނެ. އެކަމަށް މިއަދު ލިބިފައިވާ ފުރުސަތުގައި ފިޔަވަޅު އަޅަން ޖެހޭ."