އަންނަ މަހު ސިނަމާތަކަށް ގެންނަން ނިންމާފައިވާ އަކްޝޭ ކުމާރުގެ "ސަރުފީރާ" ގެ ޓްރެއިލާ މިއަދު އާންމުކޮށްފި އެވެ.
މި ފިލްމަކީ އިންޑިއާގެ ބަޖެޓް އެއާލައިން، "އެއާ ޑެކަން" އުފެއްދި ޖީއާރް ގޯޕިނާތަށް ބިނާކޮށް ހަދާފައިވާ އެއްޗެކެވެ. "ސަރުފީރާ" ހަދާފައި ވަނީ ޑައިރެކްޓަރު ސުދާ ކޮންގަރާ، މަޝްހޫރު ތަމަޅަ އެކްޓަރު ސޫރިއާއާ އެކީ ގެނެސްދިން 2020 ގެ ފިލްމު "ސޫރަރައީ ޕޮއްޓުރޫ" އަސްލަކަށް ބަލައިގެންނެވެ.
އެ ފިލްމަކީ 68 ވަނަ ނެޝަނަލް އެވޯޑްސްގައި ފަސް އެވޯޑް ހޯދި ފިލްމެކެވެ. އެއީ ސޫރިއާ އަށް ލިބުނު މޮޅު އެކްޓަރުގެ އެވޯޑާއި އަޕަރްނާ އަށް ލިބުނު މޮޅު ބަތަލާގެ އެވޯޑާއި ބެސްޓް ފީޗާ ފިލްމުގެ އެވޯޑާއި ބެސްޓް ސްކްރީންޕްލޭގެ އެވޯޑްގެ އިތުރުން ބެސްޓް ބެކް ސްކޯ އެވެ.
އަންނަ މަހުގެ 12 ގައި ރިލީޒްކުރަން ތާވަަލުކޮށްފައިވާ އަކްޝޭގެ "ސަރުފީރާ" ގެ ކާސްޓްގައި ރާދިމާ މަދަން އާއި ޕަރޭޝް ރާވަލް އަދި ސީމާ ބިސްވާ ވެސް ހިމެނެ އެވެ. ސޫރިއާގެ ހާއްސަ ފެނިލުމެއް ވެސް ހިމެނޭ ފިލްމު ވެސް ޑައިރެކްޓްކުރީ އޮރިޖިނަލްގެ ޑައިރެކްޓްކުރި ސުދާ އެވެ.
"ސަރްފީރާ" އަކީ މި އަހަރު ބެލުންތެރިންނާ ހަމައަށް އަންނަ އަކްޝޭގެ ދެވަނަ ފިލްމެވެ. ފުރަތަމަ ފިލްމަކީ އެޕްރީލްގައި ރިލީޒްކުރި "ބަޅޭ މިޔާ ޗޯޓޭ މިޔާ" އެވެ. އަދި އޮގަސްޓް މަހުގެ 15 ގައި އަކްޝޭގެ "ކޭލް ކޭލް މޭ" ވެސް ރިލީޒްކުރާނެ އެވެ.