ރާއްޖޭގެ އާބާދީ މިހާރު އިތުރުވަމުން ނުދަނީ މީގެ އަހަރުތަކެއް ކުރިން އާބާދީ ބޮޑުތަނުން ކޮންޓްރޯލު ކުރުމަށް ރައްޔިތުންގެ ބޮލަށް ސަވާރުކުރުވި ދޭތެރެ ދުރުކުރުމުގެ ދޯހަޅި ސިޔާސަތުގެ ސަބަބުން ކަމަށާއި މިހާރު ފެންނަނީ އޭގެ ހިތި ކަމަށް ޝެއިހު އަހުމަދު ސަމީރު ވިދާޅުވެއްޖެ އެވެ.
ރާއްޖޭގައި ވިހާ ރޭޓް ދަށްވެ، އާބާދީ އިތުރުވަމުން ނުދާތީ ފެމިލީ މިނިސްޓަރު ޑރ. އައިޝަތު ޝިހާމް ޓީވީ ޕްރޮގްރާމެއްގައި ފާޅުކުރެއްވި ކަންބޮޑުވުންތަކާ ގުޅިގެން ސަމީރު މިރޭ ސޯޝަލް މީޑިއާ ޕޯސްޓެއްގައި ވިދާޅުވީ ރާއްޖޭގެ އާބާދީގެ ކުރިއެރުން ރަނގަޅު މިސްރާބެއްގައި ހުއްޓައި އެކަން ފާލުން ނެއްޓުވީ ކުރީގެ ރައީސް މައުމޫން އަބްދުލް ގައްޔޫމްގެ 30 އަހަރުގެ ވެރިކަމުގެ ތެރޭގައި 1978-2008 އަށް ކަމަށެވެ.
"ގައުމުގެ މުސްތަޤުބަލަށް ފަރުވާލެއް ނެތި އާބާދީ ބޮޑުތަނުން ކޮންޓްރޯލު ކުރުމަށް ރައްޔިތުންގެ ބޮލަށް ސަވާރުކުރުވި ދޭތެރެ ދުރުކުރުމުގެ ދޯހަޅި ސިޔާސަތުގެ ހިތި ފިލުވައި ޤައުމުގެ މިސްރާބު ސީދާކޮށް މުސްތަޤުބަލައިގެން އަމާން އައްސޭރި އަށް ދަތުރު ކުރުމަަށްޓަކައި ކަނޑައަޅަން ޖެހޭ ސިޔާސަތުތަކާއި، ދިރިއުޅުމުގެ ވައްޓަފާޅި އަށް ގެންނަން ޖެހޭ ބަދަލާއި އެކަމަށް ކުރަން ޖެހޭ މަސައްކަތް ވަރަށް ބޮޑުކަމުގައި ދެކެން." އޭނަ ވިދާޅުވި އެވެ.
ސަމީރު ވިދާޅުވީ ދޭތެރެ ދުރުކޮށް އާބާދީ ކޮންޓްރޯލް ކުރުމުގެ ސިޔާސަތުގެ ތެރޭގައި ތަރުބިޔަތުވެފައިވާ ޖީލަކަށް އެކަން ކުރުން ވެގެން ދާނީ ވަރަށްބޮޑު ގޮންޖެހުމަކަށް ކަމަށް ދެކެވަޑައިގަންނަވާ ކަމަށެވެ.
"ކޮންމެއަކަސް އާބާދީގެ ކުރުއެރުން ފަހިކުރުމަކީ ޤައުމުގެ މުސްތަޤުބަލަށްޓަކައި މިއަދު ކޮންމެހެން ވެސް ކުރަން ޖެހިފައިވާ ކަމެއް." އޭނަ ވިދާޅުވި އެވެ.
މިނިސްޓަރު އައިޝަތު ވިދާޅުވީ އާބާދީ އިތުރުވަމުން ނުދާ މައްސަލައާ ގުޅިގެން ގައުމީ ފެންވަރުގައި ވަރަށް އަވަހަށް މަޝްވަރާތަކެއް ވެސް ކުރަން ޖެހޭ ކަމަށެވެ.
އެންމެ ފަހުން 2022 ގައި ކުރިއަށް ގެންދިޔަ ބޯހިމެނުމުގެ ނަތީޖާ އަށް ރިއާޔަޔްކޮށް، މޯލްޑިވްސް ބިއުރޯ އޮފް ސްޓެޓިސްޓިކްސްއިން ބުނެފައިވާ ގޮތުގައި 2014 ގައި ބޯހިމެނި އިރު، ރާއްޖޭގެ އާބާދީ އަކީ 338،434 ގައެވެ. އަދި 2022 އަހަރުގެ ތަފާސްހިސާބުތަކުން ދައްކާ ގޮތުގައި އާބާދީ އަކީ 382،751 އެވެ.
އެހެންވެ އެންމެ ފަހުން ބޯހިމެނުން ކުރިއަށް ގެންދިއުމާ ދޭތެރޭގައި ދިޔަ އަށް ތެރޭގައި އާބާދީއަށް އިތުރުވީ 44،317 މީހުންނެވެ. އެއީ އެވްރެޖްކޮށް އަހަރަކު 5،500 ކުދިންނެވެ.
ރާއްޖޭގެ އާބާދީ އިތުރުވަމުން ނުދާތީ މި އަހަރުގެ ކުރީކޮޅު ފަސްޓްލޭޑީ ސާޖިދާ މުހައްމަދު ވެސް ކަންބޮޑުވުން ފާޅުކުރައްވާފައިވެ އެވެ.
ރާއްޖޭގެ މިހާރުގެ އާބާދީގެ ހާލަތާ ގުޅޭ ގޮތުން ފެބްރުއަރީ 27 ގައި ބޭއްވި "ޗޭންޖިން ޕޮޕިއުލޭޝަން ޑައިނަމިކްސްއިން މޯލްޑިވްސް" ގައި އެ ކަމަނާ ވިދާޅުވެފައި ވަނީ އާބާދީ އިތުރު ކުރަން ޖެހޭ ކަމަށާއި އެހެން ނޫން ކަމަށްވާ ނަމަ ގައުމީ ތަރައްގީ އަށް ވަރަށް ބޮޑަށް ހުރަހަކަށް ވާނެ ކަމަށެވެ.
ސާޖިދާ ވިދާޅުވެފައި ވަނީ ރާއްޖޭގައި އުފަންވާ ނިސްބަތް ދަށްވަމުންދާ މައްސަލައަށް ޙައްލު ގެނައުމަށް ހުރިހާ ފަރާތެއް ގުޅިގެން މަސައްކަތް ކުރަން ޖެހޭ ކަމަށެވެ. އެހެން ނޫން ނަމަ މީގެ 20 އަހަރު ފަހުން ރާއްޖޭގެ އިގުތިސާދީީ އިންޖީނު ހިންގުމަށް ވަޒީފާ އަދާކުރާނެ ވޯކް ފޯހެއް ނެތުމުގެ މައްސަލައާ ކުރިމަތިލާން ޖެހިދާނެ ކަމަށެވެ.
"ރާއްޖޭގެ އާބާދީގެ ހަތްދިހަ ޕަސެންޓަކީ މަސައްކަތްކުރާ އާބާދީ. މިއީ މިހާރު ވަރަށް ބޮޑު ކުރިއެރުމެއް ޤައުމީ ފެންވަރުގައި،" އެ ކަމަނާ ވިދާޅުވި އެވެ. "އެހެން ނަމަވެސް އުފަންވާ ކުދިންގެ ރޭޓަށް ބަލާއިރު ރާއްޖޭގެ މަސައްކަތްކުރާ އާބާދީ ބޮޑުތަކުން ކުޑަވެ ޤައުމީ ތަރައްގީ އަށް އޭގެ ނޭދެވޭ އަސަރު ކުރާނެ. އެކަމަށް މިއަދު ލިބިފައިވާ ފުރުސަތުގައި ފިޔަވަޅު އަޅަން ޖެހޭ."