މަސްތުވެގެން އިނދެ ދުއްވި މައްސަލައެއްގައި އެމެރިކާގެ މަޝްހޫރު މިއުޒިކީ ފަންނާނު ޖަސްޓިން ޓިމްބަލޭކް މިއަދު ހައްޔަރުކޮށް، ދައުވާކޮށްފި އެވެ.
މިކަމާ ގުޅޭ ގޮތުން ނިއު ޔޯކްގެ ސަފޯލްކް ކައުންޓީ ޑިސްޓްރިކްޓް އެޓާނީގެ އޮފީހުން ނެރުނު ބަޔާނެއްގައި ބުނީ 43 އަހަރުގެ ފަންނާނު ހައްޔަރުކުރީ ހެނދުނު ކަމަށާއި މަސްތުވެގެން އިނދެގެން ދުއްވި މައްސަލައިގައި އޭނަ ހައްޔަރު ކުރުމަށް ފަހު، ދައުވާކޮށް، ކަފާލާތާ ނުލައި މިހާރު ދޫކޮށްލާފައިވާ ކަމަށެވެ.
ނަމަވެސް އިތުރު ތަފުސީލެއް ދީފައެެއް ނުވެ އެވެ.
ނިއު ޔޯކްގެ އުސޫލުތައް ހަމަޖެހިފައި އޮންނަ ގޮތުން މަސްތުވެގެން އިނދެގެން ދުއްވައިފި ނަމަ އަހަރެއްހާ ދުވަހުގެ ޖަލު ހުކުމަކާ އެކީ 1،000 ޑޮލަރުން ޖޫރިމަނާ ކުރެވޭނެ އެވެ. އަދި ލައިންސަންސް މަަދުވެގެން ހަ މަހަށް ހިފަހައްޓާނެ އެވެ.
ދިހަ ގްރެމީ އެވޯޑް ހާސިލުކޮށްފައިވާ އަދި "ޕްރިންސް އޮފް ޕޮޕް" ގެ ގޮތުގައި ސިފަކުރާ ޓިމްބަލޭކްގެ އެންމެ ފަހުގެ އަލްބަމަކީ މި އަހަރުގެ މާޗްގައި ނެރުނު "އިވްރީތިން އައި ތޯޓް އިޓް ވޯޒް" އެވެ. މިއީ އޭނަގެ ހަ ވަނަ ސްޓޫޑިއޯ އަލްބަމެވެ. ބައެއް ފިލްމުތަކުގައި އެކްޓް ވެސް ކޮށްފައިވާ ފަންނާނު މަސްތުވެގެން އިނދެ ދުއްވި މައްސަލައިގައި ދައުވާކޮށްފައިވާ އިރު، މި ހަފުތާ ބަންދުގައި ޝިކާގޯ ދެ ޝޯއެއްގެ އިތުރުން އަންނަ ހަފުތާގެ އަންގާރައިގައި ނިއު ޔޯކްގައި ޕަފޯމްކުރަން ވެސް ހަމަޖެހިފައިވެ އެވެ.
ދެ ކުދިންގެ ބައްޕަ ޓިމްބަލޭކްގެ އަންހެނުންނަކީ ބަތަލާ ޖެސިކާ ބިއެލް އެވެ.