ސިޔާސީ ދާއިރާ އަށް މިހާރު ނުކުމެފައިވާ އިންޑިއާގެ ބަތަލާ ކަންގަނާ ރަނާވަތު، އޭނަގެ ދެބޭންގެ ދެދަރި ޒުވާނެއްގެ ކައިވެނީގެ ހަދިޔާއަކަށް ގެއެއް ދީފި އެވެ.
ވަރޫން ރަނާވަތު ކިޔާ ކަޒިން އާއި އޭނަގެ އަންހެނުންނަށް ކަންގަނާ ހިތްގައިމު ގެއެއް ހަދިޔާކުރީ ޗަންދީގަޅުންނެވެ. މި ވާހަކަ ވަރޫން އިންސްޓަގްރާމްގައި ވެސް ހިއްސާކޮށް ކަންގަނާ އަށް ޝުކުރު އަދާކޮށްފައިވެ އެވެ.
ކަންގަނާ އަކީ ބޮލީވުޑްގެ ބަތަލާއިންގެ ތެރެއިން އެންމެ އަގުބޮޑުކޮށް ފިލްމު ކުޅޭ އެއް ބަތަލާ އެވެ. އަދި އޭނަ އަކީ މަނިކަރްނިކާ ފިލްމްސްގެ ނަމުގައި އަމިއްލަ ފިލްމު ކުންފުންޏެއް ވެސް ހިންގަމުން އަންނަ މީހެކެވެ. ކަންގަނާ އަކީ މިހާރު އިންޑިއާގެ ގާނޫނު ހަދާ މަޖިލީހުގެ ތިރިގެ، ލޯކް ސަބާގެ އިންތިހާބީ މެންބަރެކެވެ. އޭނަ ލޯކް ސަބާ އަށް އިންތިހާބުވީ މި މަހުގެ 1 ގައި ނިންމި އިންތިހާބުގައި ވާދަކޮށްގެންނެވެ.
ވެރިކަން ކުރާ ބީޖޭޕީގެ މެންބަރެއްގެ ގޮތުގައި ކަންގަނާ ތަމްސީލު ކުރާނީ އުފަން ސްޓޭޓް ހިމާޗަލް ޕްރަދޭޝްގެ މަންޑީ ދާއިރާ އެވެ.