ބޮލީވުޑަށް ތައާރަފު ކުރުމުގެ މަގުމަތީގައި މިހާރު ހުރި އެކްޓަރު ސައިފް އަލީ ޚާންގެ ދޮށީ ފިރިހެން ދަރިފުޅު އިބްރާހީމް އަލީ ޚާނާއި އަކްޝޭ ކުމާރު އެކީގައި ފިލްމަކަށް ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ.
ބައެއް މީޑިއާތަކުން ވަނީ އެ ދެ މީހުން އިއްޔެ އެކީގައި ސްޓޫޑިއޯއަލުން ނުކުންނަކޮށް ފެންނަ ފޮޓޯތަކަކާއި ވީޑިއޯތަކެއް ވެސް އާންމުކޮށްފަ އެވެ. އަދި އަކްޝޭ އާއި އިބްރާހީމް ޕަޕަރާޒީންނަށް ފޮޓޯ ނަން ނަގަން ފުރުސަތުގެ ދުނުމުގެ ގޮތުން ޕޯސް ވެސް ކޮށްފައިވެ އެވެ.
އިބްރާހީމް، 22، އާ އެކީ އަކްޝޭ ފިލްމެއް ކުޅެން އުޅޭކަމުގެ ވާހަކަ ދެކެވެން ފެށި އިރު، އޭނަގެ އެއްބަނޑު އެއްބަފާ ދައްތަ، ބަތަލާ ސާރާ އަލީ ޚާނާ އެކީ އަކްޝޭ ދެ ފިލްމެއްގެ މަސައްކަޔްކޮށްފައިވެ އެވެ. އެއީ 2021 ގެ "އަތުރަންގީ ރޭ" އާއި މި އަހަރު ރޮލީޒްކުރަން ހަމަޖެހިފައިވާ "ސްކައިފޯސް" އެެވެ.
ސާރާ އާއި އިބްރާހީމްގެ ބައްޕަ ސައިފާ އެކީ ވެސް އަކްޝޭ ފިލްމުތަކެއް ކުޅެފައިވެ އެވެ. އެއީ "މޭ ކިލާޅީ ތޫނު އަނާޅީ" އާއި "ޔޭ ދިއްލަގީ" ގެ އިތުރުން "ތަޝަން" އެވެ.
އިބްރާހީމް ބޮލީވުޑަށް ތައާރަފު ކުރަން ހަމަޖެހިފައި ވަނީ ކަރަން ޖޯހަރްގެ ދަރުމާ ޕްރޮޑަކްޝަނުން މި އަހަރު ގެނެސްދޭނެ ކަމަށް ބެލެވޭ ފިލްމު "ސަރުޒަމީން" އިންނެވެ. މިދިޔަ އަހަރު ޝޫޓިން ނިންމާފައި އޮތް މި ފިލްމަކީ އެކްޓަރު ބޮމަން އިރާނީގެ ދަރިފުޅު ކެޔޯޒް އިރާނީގެ ޑައިރެކްޝަނެކެވެ. "ސަރުޒަމީން" ގެ ކާސްޓްގައި ކާޖޮލް އާއި މަޝްހޫރު މަލަޔާޅަމް އެކްޓަރު ޕްރިތުވީރާޖް ސުކްމަރަން ވެސް ހިމެނެ އެވެ.
މި ފިލްމުގެ އިތުރަށް ދާދި ފަހުން އިބްރާހީމް ވަނީ ދަރުމާ އަށް "ނާދާނިޔާން" ކިޔާ ފިލްމެއްގެ މަސައްކަތް ވެސް ނިންމައިފަ އެވެ. އާ ޑައިރެކްޓަރު ޝައުނާ ގޯތަމްގެ މި ފިލްމުގެ ބަތަލާ އަކީ ކުރީގެ ބަތަލާ ސްރީދޭވީގެ ހަގު ދަރިފުޅު ހުޝީ ކަޕޫރެވެ. ރިޕޯޓްތައް ބުނާ ގޮތުން އިބްރާހީމް މިހާރު އަންނަނީ ހުޝީގެ ދައްތަ ޖާންވީ ކަޕޫރްގެ އިތުރުން މަހީމާ މަކްވާނީއާ އެކީ ރޮމޭންޓިކް ކޮމެޑީއެއްގެ މަސައްކަތް ވެސް ފަށަން ތައްޔާރުވަމުންނެވެ.