ރާއްޖެ އަށް މި އަހަރު ޒިޔާރަތްކުރާ އެއް މިލިއަން ވަނަ ޓޫރިސްޓް މި މަހުގެ ތެރޭގައި ޒިޔާރަތް ކުރާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
ދައުލަތުގެ މީޑިއާ، ޕީއެސްއެމްގައި މިނިސްޓަރު ވިދާޅުވީ އެއް މިލިއަން ވަނަ ޓޫރިސްޓުން ޒިޔާރަތް ކުރާނީ މި މަހުގެ ފަހުކޮޅު ކަމަށެވެ. އެހެންވެ އެ ޓޫރިސްޓަށް ހޫނު މަރުހަބާއެއް ކިޔާނެ ކަމަށާއި އެކަމުގެ ތައްޔާރީތައް މިހާރު ވެސް ކުރިއަށްދާ ކަމަށް ފައިސަލް ވިދާޅުވި އެވެ.
"އެކަން ވަރަށް ބޮޑަށް ސެލިބްރޭޓުކުރާނަން ވަރަށް ގަދައަށް. އަހަރު ނިންމާލާނީ ޓޭގަޓުކުރި އަދަދު ހާސިލްކޮށް، ދެ މިލިއަން ފަތުރުވެރިންނާ އެކު،" މިނިސްޓަރު ވިދާޅުވި އެވެ. "އުންމީދު ބޮޑު 2.1 މިލިއަން ނޫނީ 2.2 މިލިއަނަށް އެރައިވަލްސް ހިނގައިދާނެ ކަމަށް."
ޓޫރިޒަމް މިނިސްޓްރީގެ އެންމެ ފަހުގެ ހިސާބުތައް ދައްކާ ގޮތުން މި މަހުގެ 10 ގެ ނިޔަލަށް ރާއްޖެ އަށް ޖުމްލަ 932،398 ޓޫރިސްޓުން ޒިޔާރަތްކޮށްފައިވެ އެވެ. މިހާރު ރާއްޖެ އެންމެ ގިނައިން ޓޫރިސްޓުން އަންނަ ތިން ގައުމަކީ ޗައިނާ އާއި ރަޝިއާގެ އިތުރުން އިނގިރޭސިވިލާތެވެ.
މި މަހު އެއް މިލިއަން ވަނަ ޓޫރިސްޓަށް މަރުހަބާ ކިޔަން ތައްޔާރުވަމުން އަންނަ އިރު، މިއީ ކުރިން ވެސް ފާހަގަ ކުރަމުން އަންނަ ކަމެކެވެ. މިދިޔަ އަހަރު ރާއްޖެ އަށް ޖުމްލަ 1.8 މިލިއަން ޓޫރިސްޓުން ޒިޔާރަތްކޮށްފައިވާ އިރު، އެއް މިލިއަން ވަނަ ޓޫރިސްޓަކީ އިނގިރޭސިވިލާތުގައި ދިރިއުޅޭ ރަޝިއާގެ މީހެއް ކަމަށްވާ އެންޓޮން ޕަވްލޮވް އެވެ.
އޭނަ އަށް ރާއްޖެ އިން މަރުހަބާ ކީ މިދިޔަ އަހަރުގެ ޖުލައި 16 ގަ އެވެ.