އަންހެނުންނަށް ހާއްސަ ތަކެތި ވިއްކާ މާލޭގެ "ސޮރީ ބޯއިސް" ފިހާރަ، ރޭ ފަޅާލައިގެން ވައްކަންކޮށްފި އެވެ.
ފުލުހުން ބުނީ ރޭ މެންދަމު 3:45 ހާއިރު މަޖިދީ މަގުގައި ފިހާރައިގެ ބިއްލޫރިގަނޑު ތަޅާލައި ވައްކަންކޮށްފައިވާ ކަމަށެވެ. މި މައްސަލަ ފުލުހުންނަށް ރިޕޯޓްކުރުމާ ގުޅިގެން ވަގަށް ނެގި ތަކެތި ފުލުހުން ހޯދި ނަމަވެސް ވައްކަންކުރި މައްސަލައިގައި އެއްވެސް މީހަކު އަދި ހައްޔަރެއް ނުކުރެ އެވެ.
"ސޮރީ ބޯއިސް" އިން ވަގަށް ނެގި ތަކެތި ފެނުނީ ވައްކަންކޮށްގެން ނިކުންނަން އުޅެނިކޮށް މީހަކަށް ފެނުމުން ތަކެތި ދޫކޮށްލާފައި ދިއުމުން ކަމަށް ފުލުހުން ބުންޏެވެ.
މި ހާދިސާ މިހާރު އިތުރަށް ތަހުގީގު ކުރަމުން އަންނަ އިރު، މި އަހަރުގެ މިހާތަނަށް ފުލުހުންނަށް އެންމެ ގިނައިން ރިޕޯޓްކޮށްފައި ވަނީ ވައްކަމުގެ މައްސަލަތަކެވެ.