އީދުގައި ކުލަ ޖެހުމަކީ ދިވެހި ސަޤާފަތެއް ނޫން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު ވިދާޅުވެއްޖެ އެވެ.
ރާއްޖޭގައި ފަހަކަށް އައިސް މުސްލިމުންގެ ދެ އީދު ފާހަގަކުރާ އިރު، ކުލަ ޖެހުން ވަރަށް ބޮޑަށް އާންމުވެފައިވެ އެވެ. އަދި މިހާރު ފާހަގަކުރަމުން އަންނަ ބޮޑު އީދުގެ ތެރޭގައި ވެސް ރާއްޖޭގެ އެކި ހިސާބުތަކުގައި ކުލަ ޖެހުމުގެ ފޯރި ގަދަ އެެވެ.
އެހެންވެ މިކަމާ ގުޅޭ ގޮތުން އެކި ފަރާތްތަކުން އެކި ގޮތްގޮތަށް ސޯޝަލް މީޑިއާގައި ވެސް ވާހަކަ ދައްކަމުން އަންނަ އިރު، މިނިސްޓަރު ޝަހީމު މިއަދު ފޭސްބުކް ޕޯސްޓެއްގައި ވިދާޅުވީ އީދުގައި ކުލަ ޖެހުމަކީ ދިވެހި ސަގާފަތެއް ނޫން ކަމަށެވެ.
"ދިވެހި ސަޤާފަތަކީ އީދުގައި ފެން ޖެހުން." މިނިސްޓަރު ވިދާޅުވި އެވެ.
ކުލަ ޖެހުމަކީ އިންޑިއާގެ ހިންދޫން ހޯލީ ފާހަގަކުރަން ހިންގާ ހަރަކާތެެއް ގޮތަށް ފާހަގަކުރެވެ އެވެ. ނަމަވެސް މިހާރު ދިވެހިން އެ ގޮތް ކޮޕީކޮށް، ކުލަ ޖެހުމަކީ ދިވެންގެ ދެ އީދުގައި ހިންގާ ހަރަކާތަކަށްވެފައިވާ ކަމަށް ރާއްޖޭގެ ދީނީ އިލްމުވެރިންނާއި އާންމުން ވެސް ދަނީ ކަންބޮޑުވުން ފާޅު ކުރަމުންނެވެ.
މިނިސްޓަރުގެ އެހެން ޕޯސްޓެއްގައި މިއަދު ވިދާޅުވީ އިސްލާމީ ސަގާފަތުގެ އަސާސަކީ، ﷲ އަށް ޙައްޤު ގޮތުގައި އީމާންވުމާއި އަޅުކަމުގެ އިތުރުން ދިރިއުޅުމުގެ ހުރިހައި ދާއިރާއެއްގެ ކަންކަން ބައްޓަން ކުރުމަށް ﷲ ގެ ފޮތުގައި އެކަލާނގެ އަންގަވާފައިވާ އުޞޫލުތަކާއި އެކަލާނގެ ރަސޫލާގެ ސުންނަތުގައި އެކަލޭގެފާނު ބަޔާން ކުރައްވާފައިވާ ކަންކަމަށް ތަބާވުމާއި ދުނިޔޭގެ ޙަޔާތަށް ފަހު އުޚުރަވީ ޙަޔާތް އޮތްކަން ޤަބޫލުކުރުން ކަމަށެވެ.
"މި ކަންކަމުގެ މައްޗަށް އަމިއްލަ ގޮތްތައް ޚިޔާރު ނުކުރެވޭނެ." ޝަހީމު ވިދާޅުވި އެވެ.
އޭނަ ވިދާޅުވީ އިސްލާމީ އުންމަތަށް ﷲ ދަރުމަކުރެއްވި އެންމެ އުފާވެރި ދެ ޢީދު ދުވަހަކީ މި އުންމަތުގެ ރަމްޒެއް ކަމަށެވެ. އެގޮތުން އީދަކީ ފިތުތު އީދު ކަމަށާއި އަނެއް އީދަކީ އަޟްހާ އީދު ކަމަށް ވިދާޅުވި އެވެ.
"ފިޠުރު ޢީދު އަންނަނީ އިސްލާމްދީނުގެ ރުކުނެއްކަމުގައިވާ ފަރުޟު ރޯދައަށް ފަހު. އޭގެ މަޤުޞަދަކީ ޤުރުއާނުގައި ބަޔާން ކުރައްވާފައިވާ ގޮތުން [ﷲ މަތިވެރިކޮށް އަދި ހިދާޔަތް ދެއްކެވިކަމުގެ މައްޗަށް ޝުކުރުވެރިވުން]،" މިނިސްޓަރު ވިދާޅުވި އެވެ. "އަޟްހާ އީދު އަންނަނީ އިސްލާމް ދީނުގައިވާ އެންމެ ބޮޑު [ހައްޖު] އަޅުކަމަށް ފަހު. އޭގެ މަޤުޞަދެއްކަމުގައި ޤުރުއާނުގައި ބަޔާންވެގެން ވަނީ ކޮންމެ އުންމަތަކަށް ވެސް ދުވަހެއް މާތް ﷲ ލެއްވިކަމާއި މި މާތް އުންމަތުގެ މަތިވެރިވެގެންވާ ރަމްޒަކީ ﷲ އަށްޓަކައި ޤުރުބާންކުރެވޭ ކަތިލެވޭ މި ބޮޑު ދުވަސްކަން. އެއީ ﷲ ހަނދުމަކޮށް، ފަޤީރުންނަށް ކާންދީ އުފާވެރިކަން ލިބިގަތުން.އަދި އެކަލާނގެ ދެއްވި ހިދާޔަތުގެ މައްޗަށް ޝުކުރުވެރިވުން."
މިނިސްޓަރު ވިދާޅުވީ ދެ އީދާ މެދު ޤުރުއާނުގައި އައިސްފައިވާ ސީދާ ނައްޞު ގޮތަކީ މިއީ ކަމަށެވެ.
"މި ދެ ޢީދަކީ އިސްލާމް ދީނުގެ އަޅުކަމާއި ގުޅިފައިވާ މި އުންމަތުގެ އެންމެ މަތިވެރި ދެ ޢީދު."