ކުރީގެ ޕަބްލިކް ސޭފްޓީ މިނިސްޓަރު ސުމުއްވުލް އަމީރު އަބްދުލްހަންނާން ހަލީމް ދޮށިމޭނާކިލެގެފާނު މިއަދު އަވަހާރަވެއްޖެ އެވެ.
އުމުރުން 87 އަހަރުގައި އޭނަ އަވަހާރަވީ މިއަދު ހުޅުމާލޭގެ ޓްރީ ޓޮޕް ހޮސްޕިޓަލުގަ އެވެ. ޖަނާޒާ އޮންނާނީ އިޝާ ނަމާދަށް ފަހު ހުޅުމާލޭގެ އާ ސަހަރާގަ އެވެ.
ސުމުއްވުލް އަމީރު އަބްދުލްހަންނާން ހަލީމަކީ، ޖުމުހޫރިއްޔާގެ ފެށުނު އިރު 1968 ގައި އެކުލަވާލި ކެބިނެޓުގެ މެންބަރެކެވެ. އޭނަ އަކީ އެ ކެބިނެޓްގެ ބޭފުޅުންގެ ތެރެއިން އެންމެ ފަހުން ދުނިޔޭގައި ހުންނެވި ބޭފުޅާ އެވެ. ސުމުއްވުލް އަމީރު އަބްދުލްހަންނާން ހަލީމަކީ، ސުމުއްވުލް އަމީރު ކިލެގެ ކަމަށް ކޮލިލެވުނު ބޭފުޅުންގެ ތެރެއިން މިހާތަނަށް ހުންނެވި ހަމައެކަނި ބޭފުޅާ ވެސްމެ އެވެ.
إِنَّا ِلِلَّٰهِ وَإِنَّا إِلَيْهِ رَاجِعُونَ
ދިވެހިރާއްޖޭގެ ދެވަނަ ޖުމްހޫރިއްޔާގެ ފުރަތަމަ 10 އަހަރު ޕަބްލިކް ސޭފްޓީ މިނިސްޓަރ ކަމުގެ މަޤާމުގައި ދައުލަތަށް ޚިދުމަތްކުރައްވައި، އަދި ރައްޔިތުންގެ މަޖިލީހުގެ ޢިއްޒަތްތެރި މެންބަރުކަމާއި އެނޫން އެތައް ޚިދުމަތްތަކެއްވެސް ދިގު… pic.twitter.com/THbZBABFMb
— Dr Mohamed Muizzu (@MMuizzu) June 19, 2024
ސުމުއްވުލް އަމީރު އަބްދުލްހަންނާން ހަލީމް ޕަބްލިކް ސޭފްޓީ މިނިސްޓަރުކަން ކުރެއްވީ މި ޖުމުހޫރިއްޔާގެ ފުރަތަމަ 10 އަހަރު 1968-1978 އަށެވެ. އޭނަ ވަނީ 1968 މި ޖުމުހޫރިއްޔާގެ ފުރަތަމަ ރައްޔިތުންގެ މަޖިލިސްގެ މެންބަރުކަން ވެސް ކުރައްވައިފަ އެވެ.
ހަލީމް އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު އެ އާއިލާ އަށް ތައުޒިޔާ ފޮނުއްވާފައިވެ އެވެ.