އައްޑޫގައި ގާއިމު ކުރަން ނިންމާފައިވާ ގާމެންޓްރީ އަކީ ކާމިޔާބު ކަމަކަށްވެ، އޭގެ ސަބަބުން އައްޑޫގެ އިގުތިސާފަށް ހެޔޮ އަސަރުތަކެއް ކުރާނެކަމުގެ އުންމީދު ވަރަށް ބޮޑު ކަމަށް މޭޔަރު އަލީ ނިޒާރު ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމްގައި އޭނަ ވިދާޅުވީ ގާމެންޓް ފެކްޓަރީގެ ސަބަބުން އައްޑޫގައި ވަޒީފާގެ ގިނަ ފުރުސަތުތަކެއް ވެސް ފަހިވާނެ ކަމަށެވެ. ނިޒާރު ވިދާޅުވީ ގާމެންޓް ފެކްޓްރީއެއް ޤާއިމްކުރެވުމުން، ރާއްޖޭގައި ޑިމާންޑް ބޮޑު އައިޓަމްތައް ފުޅާ ދާއިރާއެއްގައި އައްޑޫގައި ތައްޔާރު ކުރެވޭނެ ކަަމަށެވެ.
މޭޔަރު ވިދާޅުވި ގޮތުގައި މި ޕްރޮޖެކްޓްގެ ސަބަބުން އައްޑު އަށް ފަހިވާނެ ރަނގަޅު އަނެއް ފުރުސަތަކީ އިންޓަނޭޝަނަލް ބްރޭންޑްތައް އުފެއްދުން ކަމަށެވެ.
"އައްޑޫގައި ގާމެންޓް ފެކްޓްރީތައް ހިންގިއިރު ދުނިޔޭގެ ނަން މަޝްހޫރު ބައެއް ބްރޭންޑްތައް އުފެއްދި، އޭގެ ތެރޭގައި ހިމެނޭ، ޓޮމީ، ވިކްޓޯރިއާސް ސީކްރެޓްގެ ބަހެއްކަހަލަ އައިޓަމްތައް، ހަމަ އައްޑޫގަ އުފައްދައިގެން އެކްސްޕޯޓްކުރި،" އޭނަ ވިދާޅުވި އެވެ. "އެހެންވީމަ މިހާރު ވެސް ކުރެވިދާނެ އެކަން."
އައްޑޫގައި ގާމެންޓް ފެކްޓްރީއެއް ގާއިމު ކުރަން ބިމުގެ އެެއްބަސްވުމުގައި ކައުންސިލާއި ބިޒްނަސް ސެންޓަ ކޯޕަރޭޝަން (ބީސީސީ) އިން އެއްބަސްވުމެއްގައި ސޮއިކުރީ މި މަހުގެ 9 ގަ އެވެ.
ބީސީސީން ބުނެފައިވަނީ މި ގާމެންޓް ފެކްޓްރީ އަކީ އިކޮނޮމިކް މިނިސްޓްރީގެ އިން ނެގުމާ އެކީ ކުރިއަށް ގެންދަން ހަމަޖެހިފައިވާ ޕްރޮޖެކްޓެއް ކަމަށެވެ.
އައްޑޫގައި މީގެ އަހަރުތަކެއް ކުރިން ވެސް ގާމެންޓް ފެކްޓްރީތަކެއް ހިންގި އެވެ. އެގޮތުން ސްރީ ލަންކާގެ ކުންފުނިތަކަކުން ގަމުގައި ފެކްޓްރީތަކެއް ހިންގާފައިވެ އެވެ.