ބޮލީވުޑްގެ ކުޅަދާނަ އެކްޓަރު އަޔޫޝްމަން ކްރާނާގެ އަންހެނުން ތާހިރާ ކޭޝަޕް ލިޔެ، ޑައިރެކްޓްކުރި ފުރަތަމަ ފީޗާ ފިލްމު "ޝަރުމާޖީ ކީ ބޭޓީ" ގެ ޓްރެއިލާ މިއަދު އާންމުކޮށްފި އެވެ.
މި މަހުގެ 28 ގައި އެމެޒޯން ޕްރައިމް ވީޑިއޯ އިން ޕްރީމިއާ ކުރަން ހަމަޖެހިފައިވާ މި ފިލްމުގައި ދައްކުވައި ދޭނީ ފަހަތު ނަމަކަށް ޝަރުމާ ކިޔާ ތިން އަންހެނެއްގެ ވާހަކަ އެވެ. "ޝަރުމާޖީ ކީ ބޭޓީ" ގެ މައިގަނޑު ކާސްޓްގައި ހިމެނެނީ މިހާރު މަދުމަދުން ފިލްމުތަކުން ވެސް ފެންނަ މަޝްހޫރު ޓީވީ ބަތަލާ ސާކްޝީ ތަންވަރާއި ދިވްޔާ ދައްތާގެ އިތުރުން ޒުވާން ބަތަލާ ސައްޔާމީ ކޭރެވެ.
"ޝަރުމާޖީ ކީ ބޭޓީ" އުފައްދާފައި ވަނީ ޕްރޮޑިއުސަރު އަތުލް ކަސްބޭކަރްގެ އެލިޕްސިސް އެންޓަޓައިންމަންޓާއި ޕްރޮޑިއުސަރު ސަމީރު ނައިރްގެ އެޕްލޯސް އެންޓަޓައިންމަންޓް ގުޅިގެންނެވެ.
މި ފިލްމު ބެލުންތެރިންނާ ހަމައަށް މި އަންނަނީ ފިލްމު އިއުލާންކުރިތާ 5 ވަރަކަށް އަހަރުންނެވެ. ދެހާސް ނަވާރައިގައި އިއުލާންކުރި "ޝަރުމީ ޖީ ބޭޓީ" ގެ މަސައްކަތް މަޑުޖައްސައިލަން ޖެހުނީ އެ އިއުލާންކުރިތާ މާ ގިނަ ދުވަސްތަކެއް ނުވަނީސް ތާހިރާ އަށް އުރަމަތީގެ ކެންސަރު ޖެހި، އެ ބައްޔަށް ފަރުވާ ހޯދަން ޖެހުމާ ގުޅިގެންނެވެ.
މީގެ ދެ އަހަރު ކުރިން ފިލްމުގެ މަސައްކަތް ފެށީ ދެ ކުދިންގެ މަންމަ ބަލިން އެއްކޮށް ފަސޭހަވުމާ ގުޅިގެންނެވެ.
ތާހިރާ މީގެ ކުރިން "ޓޮފީ" ކިޔާ ކުރު ފިލްމެއް ވެސް ގެނެސްދީފައިވެ އެވެ.