ރާއްޖޭގެ އާބާދީ އިތުރުވަމުން ނުދިއުން ގުޅިފައި ވަނީ އިޖުތިމާއީ އަދި އިގުތިސާދީ މައްސަލަތަކާ ކަމަށް އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ވިދާޅުވެއްޖެ އެވެ.
މި ސަރުކާރަށް ނިސްބަތްވާ އެކި ފަރާތްތަކުން ރާއްޖޭގެ އާބާދީ އިތުރު ނުވާތީ ކަންބޮޑުުން ފާޅުކުރަމުން އަންނަ އިރު، ދަ ޑިމޮކްރެޓްސް އަށް ނިސްބަތްވާ އަމްރު އެކްސްގައި ވިދާޅުވީ އާބާދީ އިތުރު ކުރުމަށްޓަކައި ވަރަށް ގިނަ ކަންކަން ކުރަން ޖެހޭ ކަމަށެވެ.
"އާބާދީ ދަށަށް ދިޔުމާ ގުޅިފަވަނީ އިޖުތިމާއީ މައްސަލަތަކާ އިޤްތިސާދީ މައްސަލަތައް،" އޭނަ ވިދާޅުވި އެވެ. "މި މައްސަލަތަކަށް އަވަސް ހައްލެއް އަންނަ ންޖެހޭ."
އާބާދީ އިތުރުވަމުން ނުދާ މައްސަލައިގައި މި ހަފުތާގައި ފެމިލީ މިނިސްޓަރު ޑރ. އައިޝަތު ޝިހާމް ކަންބޮޑުވުން ފާޅު ކުރައްވައި ވިދާޅުވެފައި ވަނީ އާބާދީ އިތުރުވަމުން ނުދާ މައްސަލައާ ގުޅިގެން ގައުމީ ފެންވަރުގައި ވަރަށް އަވަހަށް މަޝްވަރާތަކެއް ވެސް ކުރަން ޖެހޭ ކަމަށެވެ.
މި އަހަރުގެ ކުރީކޮޅު ފަސްޓްލޭޑީ ސާޖިދާ މުހައްމަދު ވެސް މި މައްސަލައިގައި ކަންބޮޑުވުން ފާޅުކުރައްވާފައިވެ އެވެ. އެ ކަމަ ނާ ވިދާޅުވެފައި ވަނީ އާބާދީ އިތުރު ކުރަން ޖެހޭ ކަމަށާއި އެހެން ނޫން ކަމަށްވާ ނަމަ ގައުމީ ތަރައްގީ އަށް ވަރަށް ބޮޑަށް ހުރަހަކަށް ވާނެ ކަމަށެވެ.
މިކަމާ ގުޅޭ ގޮތުން ޝެއިހް ސަމީރު ވިދާޅުވެފައި ވަނީ ރާއްޖޭގެ އާބާދީ އިތުރުވުމަށް އެޅުނު އެންމެ ބޮޑު ހުރަހަކަށްވީ ކުރީގެ ރައީސް މައުމޫން އަބްދުލް ގައްޔޫމްގެ 30 އަހަރުގެ ވެރިކަމުގެ ތެރޭގައި 1978-2008 އަށް ގައުމުގެ މުސްތަޤުބަލަށް ފަރުވާލެއް ނެތި އާބާދީ ބޮޑުތަނުން ކޮންޓްރޯލު ކުރުމަށް ރައްޔިތުންގެ ބޮލަށް ސަވާރުކުރުވި ދޭތެރެ ދުރުކުރުމުގެ ދޯހަޅި ސިޔާސަތުގެ ސަބަބުން ކަމަށެވެ.