މި ސަރުކާރު އައި ފަހުން ދޫކޮށްލި ކުށްވެރީންގެ އަދަދު ހާމަކުރަން ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ގޮވާލައްވައިފި އެވެ.
ގިނަ އަދަދެއްގެ ކުށްވެރިންތަކެއް ކުރީގެ ސަރުކާރުން ދޫކޮށްލުމާ ގުޅިގެން ކުށް ކުރިން ވަރަށް ބޮޑަށް އިތުރުވެއްޖެ ކަމަށް ވިދާޅުވެ ފުލުހުންގެ ތަރުޖަމާނުގެ މަގާމުގައި ހުންނެވި އެސިސްޓަންޓް ޕޮލިސް ކޮމިޝަނަރު އިއްޔެ ސޯޝަލް މީޑިއާގައި ދެއްކެވި ވާހަކަތަކާ ގުޅިގެން މާރިޔާ އެކްސް ޕޯސްޓެއްގައި ވިދާޅުވީ ރެޒިޑިވިސްޓުންގެ އާދަކާދަ ދިރާސާތަކުން ދައްކާ ގޮތުގައި ކުށުގެ ވެށިން ދޫކުރާ މީހުން އަލުން ކުށްކުރުމަށް މުއްދަތެއް އޮންނަ ކަމަށް ނުދައްކާ ކަމަށެވެ.
"އާ ސަރުކާރު އައުމުންނާއި މަޖިލިސް އިންތިހާބަށް ސަރުކާރުން ދޫކުރި މީހުންގެ އަދަދު ހާމަކުރަން ގޮވާލަން." އޭނަ ވިދާޅުވި އެވެ.
ޝިފާން އިއްޔެ ވިދާޅުވީ ކުށްކުރުން އިތުރުވި މައިގަނޑު އެއް ސަބަބަކީ މީގެ 10 ވަރަކަށް މަސް ދުވަސް ކުރިން 434 ކުށްވެރިން މުޖުތަމައު އަށް ދޫކޮށްލާފައިވުން ކަމަށާއި އެ މީހުން ދޫކުރީ މޮނިޓާކުރެވޭނެ ހަރުދަނާ ނިޒާމެއް ވެސް ނެތި ކަމަަށެވެ. އަދި މާލޭގައި މިހާރު ކުށް ކުރުން ވަރަށް ބޮޑަށް އިތުރުވެފައި އޮތުމަކީ ހަގީގަތެއް ކަމަށް ވެސް ވިދާޅުވި އެވެ.
ޝިފާންގެ މި ވާހަކަތަކާ ގުޅިގެން ފުލުހުން ވެސް މިހާރު ދައްކަނީ ސިޔާސީ ވާހަކަތައް ކަމަށް ބުނެ ގިނަ ބައެއްގެ ފާޑުކިޔުންތައް އަމާޒުވެފައިވެ އެވެ.