ކުރިން ވެސް އެކީގައި ފިލްމުތަކެއް ކުޅެފައިވާ ހޮލީވުޑްގެ މަޝްހޫރު ދެ ތަރިން ކަމަށްވާ ބެން އެފްލެކާއި މެޓް ޑޭމަން އަނެއްކާ ވެސް އެކީގައި ފިލްމެއް ކުޅެން ތައްޔާރުވާން ފަށައިފި އެވެ.
މީޑިއާތަކުން ބުނީ ދެ ތަރިންގެ އާ ފިލްމަކީ "ރިޕް" ކިޔާ ކްރައިމް ތުރިލާއެއް ކަމަށެވެ. މީގެ ޑައިރެކްޓަރަކީ "ސްމޯކިން އޭސެސް" އާއި "ދި އޭ-ޓީމް" އަދި "ސްޓްރެޗް" ފަދަ ފިލްމުތައް ގެނެސްދިން ޖޯ ކާނަހަން އެވެ. އޭނަގެ އެންމެ ފަހުގެ ފިލްމަކީ 2021 ގެ "ކޮޕްޝޮޕް" އެވެ.
ޖޯގެ ކުރިއަށް ހުރި ޕްރޮޖެކްޓްތަކުގެ ތެރޭގައި "ޝެޑޯ ފޯސް" އާއި "ނޮޓް ވިތައުޓް ހޯޕް" ހިމެނެ އެވެ.
ހޮލީވުޑްގެ ޚަބަރުތައް ގެނެސްދޭ މީޑިއާތަކުން "ރިޕް" ގެ ތައްޔާރީތައް މިހާރު ވަމުން އަންނަ އިރު، މި ފިލްމަކީ އެފްލެކާއި ޑޭމަން ގުޅިގެން އުފައްދާފައިވާ ޕްރޮޑަކްޝަން ހައުސް، އާޓިސްޓްސް އިކްއިޓީން ޕްރޮޑިއުސްކުރިމުގައި ވެސް ހިއްސާވާ އެއްޗެއް ކަމަށެވެ.
ދެ ތަރިން އެންމެ ފަހުން އެކީގައި ފެނިފައި ވަނީ މިދިޔަ އަހަރުގެ "އެއާ" އިންނެވެ. އެއީ އެފްލެކްގެ ޑައިރެކްޝަނެކެވެ. އެފްލެކާއި ޑޭމަން އެކީގައި ކުޅުނު އިތުރު ފިލްމުތަކުގެ ޔެރޭގައި "ގުޑް ވިލް ހަންޓިން"، "ދަ ލާސްޓް ޑުއެލް"، "ޗޭސިން އާމީ" އަދި "ސްކޫލް ޓައިސް" ހިމެނެ އެވެ.