މިއަހަރުގެ ހައްޖު އޮޕަރޭޝަން ކާމިޔާބު ކަމަށާއި، ކަންކަން އިތުރަށް ރަނގަޅު ކުރުމަށް އަޅަންޖެހޭ ފިޔަވަޅުތައް އަޅާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރު ޝަހީމް މީޑިއާއާ ހިއްސާކުރެއްވި މެސެޖެއްގައި ވިދާޅުވީ ހައްޖު އޮޕްރޭޝަން ކާމިޔާބުކަމަށް އުފަލާއެކު ފާހަގަކުރާ ކަމަށެވެ. މިފަހަރު ހައްޖުގައި ދިވެހި ހާޖީންނަށް ފެންވަރު ރަނގަޅު ދިވެހި ރަހަތަކާއެކު ކާނާ ފޯރުކޮށްދެއްވުނު ކަމަށާއި، ބަލި މީހުންނަށް އެންމެ މަތީ ދަރަޖައިގައި އެހީތެރިކަން ފޯރުކޮށްދެވުނު ކަމަށެވެ. އެގޮތުން ޑައިލެލިސް ހަދާ ފަރާތަކާއި، ކެންސަރު ފަރުވާ ނަގާ ބައެއް ބޭފުޅުން އަދި ހިތުގެ ބަލި ހުންނަ ބައެއް ބޭފުޅުން ހާޖީންގެ ތެރޭގައި ތިބި ކަމަށާއި، އެންމެނަށް އޯގާތެރިކަން ފޯރުކޮށްދެވުނުކަން ފާހަގަކުރެއްވިއެވެ. އަދި އެޑްމިޓު ކުރެވުނު ފަރާތްތަކަށްވެސް އެހީތެރިކަން ފޯރުކޮށްދެވުނުކަން ފާހަގަކުރެއްވިއެވެ.
މިފަހަރު ހައްޖަށްދިޔަ ފަރާތްތަކަށް ޓްރެކިން ޑިވައިސެއް ދީފައިވާއިރު، މިނިސްޓަރު ޝަހީމް ވިދާޅުވީ މަގު އޮޅުނު 100 އެއްހާ ހާޖީން ޑިވައިސްގެ އެހީގައި ލޮކޭޓްކޮށްގެން ގެނެވުނު ކަމަށެވެ. އަދި އަރަފާތަށް ނުވަދެވޭ އެކަކު ވެސް ނެތް ކަމަށާއި ބަލި މީހުން ވެސް އަރަފަރާތަށް ގެންދެވުނު ކަމަށް ވިދާޅުވިއެވެ.
މީގެއިތުރުން މިނިސްޓަރު ޝަހީމް ވިދާޅުވީ އަރަފާތުގެ ފޭލިގޭގެ އިންތިޒާމްތައް ފުރިހަމަ ކަމަށާއި އެހެންނަމަވެސް މިނާގެ ފޭލިގޭގެ ތާށިކަމެއް ހުރި ކަމަށެވެ.
"އެކަން މެދުވެރިވި ސަބަބުތައް ބަލައި ކުރިއަށް އޮތްތަނުގައި ރަނގަޅުކުރަން އަޅަންޖެހޭ ފިޔަވަޅުތައް އަޅާނެ." މިނިސްޓަރު ޝަހީމް ވިދާޅުވިއެވެ.
މީޑިއާއަށް ފޮނުވި މެސެޖުގައި މިނިސްޓަރު ޝަހީމްވަނީ ހައްޖުގެ ކަންކަމުގައި ހަރަކާތްތެރިވި ފަރާތްތަކަށް ޝުކުރު އަދާކުރައްވާފައެވެ.
"ރަނގަޅުކުރަންޖެހޭ ކަންތަށްތަކެއް ވަނީ ފާހަގަކުރެވިފަ. އިންޝާ ﷲ އަންނަ އަހަރަށް އެކަންކަން ރަނގަޅުކުރާނެ. މިއީ ޙައްޖު ކޯޕަރޭޝަންގެ ތާރީޚުގައި އެންމެ ގިނަ އަދަދަކަށް ހާޖީން ގެނެވުނު ދެވަނަ ފަހަރު، ﷲ ގެ ރަޙުމަތުން ޙައްޖު އޮޕްރޭޝަން ކާމިޔާބުކަމަށް އުފަލާއެކު ފާހަގަކުރަން." މިނިސްޓަރު ޝަހީމް ވިދާޅުވިއެވެ.
މިނިސްޓަރު ޝަހީމް ވިދާޅުވީ މިވަރުގެ ކަމެއް ކިތައްމެ ފުރިހަމަކުރަން އުޅުނުނަމަވެސް އުނިކަން ހުންނާނެ ކަމަށާއި އިންސާނުންނަކީ އުނިބައެއް ކަމަށެވެ. އެންމެ ބޮޑު އިސްކަމެއް ދިނީ ހޫނު ގަދަ މާހައުލެއްގައި ހާޖީންގެ ސަލާމަތާއި ސިއްހަތާއި ރައްކާތެރިކަމަށްކަންވެސް މިނިސްޓަރު ފާހަގަ ކުރެއްވިއެވެ.
ރަސްމީ ކޯޓާއާއި ހާއްސާ ކޯޓާގެ ދަށުން މިއަހަރު ރާއްޖެއިން 1150 މީހުން ހައްޖަށް ގޮސްފައިވެއެވެ.