ބޮލީވުޑުން ފުރުސަތު ލިބުނީ ކުރީގެ ބަތަލާ ޕްރިތީ ޒިންތާއާ ވައްތަރުކަމުން ކަމަށް ބަތަލާ ތާޕްސީ ޕައްނޫ ބުނެފި އެވެ.
ކްރިކެޓް ތަރި ޝިކާރުގެ ދަވަންގެ ޓޯކް "ދަވަން ކަރޭގޭ" ގައި ވާހަކަ ދައްކަމުން 36 އަހަރުގެ ބަތަލާ ބުނީ އޭނަ ޕްރިތީއާ ވައްތަރު ކަމަށް ވަރަށް ގިނަ ބަޔަކު ގަބޫލުކުރާ ކަމަށާއި އަމިއްލަ އަށް ވެސް ޕްރިތީއާ ވައްތަރު ގޮތެއް ހުންނަ ކަމަށް ގަބޫލު ކުރެވޭ ކަމަށް ބުންޏެވެ.
"އެހެންވެ އަސްލު އަހަންނަށް ބޮލީވުޑަށް ނުކުންނަން ފުރުސަތު ލިބުނީ." ޑައިރެކްޓަރު ޑޭވިޑް ދަވަންގެ 2013 ގެ "ޗަޝްމޭ ބައްދޫ" އިން ބޮލީވުޑަށް ނުކުތް ތާޕްސީ ބުންޏެވެ.
އޭގެ ކުރިން އޭނަ މުޅިން ވެސް މަސައްކަތް ކުރަމުން އިންޑިއާގެ ދެކުނުގެ ފިލްމުތަކުގަ އެވެ. ނަމަވެސް މިހާރު ތާޕްސީ އަކީ ބޮލީވުޑާއި ދެކުނުގައި ވެސް މަސައްކަތް ކުރަމުން އަންނަ ހުނަރުވެރި އަދި އެހާމެ ކާމިޔާބު ބަތަލާއެކެވެ.
ތާޕްސީ ބުނީ ޕްރިތީ އަކީ އޭނަ އަށް ވެސް ވަރަށް ކަމުދާ ބަތަލާއެއް ކަމަށާއި ޕްރިތީއާ ވައްތަރުވެގެން ބޮލީވުޑުން ފުރުސަތު ލިބުމަކީ ކާމިޔާބު އެތައް ފިލްމެއް ކުޅެފައިވާ ބަތަލާގެ ފޭނުން އުންމީދުކުރާ ވަރުގެ ބަތަލާއަކަށް ވާން ވަރަށް މަސައްކަތް ވެސް ކުރަން ޖެހޭ ކަމެއް ކަމަށެވެ.
"ޕްރިތީގެ ފޭނުންގެ އެ އެކްސްޕެކްޓޭޝަނާ އެއްވަރަށް އަހަރެން މަސައްކަތް ކުރަން ވެސް ޖެހޭ ކަމަށް ގަބޫލު ކުރަން." ތާޕްސީ ބުންޏެވެ.
ދާދި ފަހުން ކައިވެނި ކުރި ތާޕްސީގެ އެންމެ ފަހުގެ ފިލްމަކީ މިދިޔަ އަހަރު ރިލީޒްކުރި ޝާހްރުކް ޚާންގެ "ޑަންކީ" އެވެ. އޭނަގެ ކުރިއަށް ހުރި ފިލްމުތަކުގެ ތެރެއިން ދެން އެންމެ އަވަހަށް ބެލުންތެރިންނާ ހަމައަށް އަންނާނީ އޮގަސްޓް 15 ގައި ރިލީޒްކުރަން ހަމަޖެހިފައިވާ އަކްޝޭ ކުމާރުގެ "ކޭލް ކޭލް މޭ" އެވެ.
ޕްރިތީ، 49، ވަރަށް ގިނަ ދުވަސްތަކެއް ވަންދެން ފިލްމީ މަސައްކަތްތަކާ ދުރުގައި ހުރުމަށް ފަހު، މިހާރު ވަނީ އަލުން ފިލްމު ކުޅެން ފަށައިފަ އެވެ. އެގޮތުން އޭނަ ސޮއިކުރި ފުރަތަމަ ފިލްމު ސަނީ ޑިއޯލްގެ "ލާހޯރް، 1947" ގެ ޝޫޓިން ދާދި ފަހުން ވަނީ ނިންމާލައިފަ އެވެ.
އާމިރު ޚާން ޕްރޮޑިއުސްކޮށް، ރާޖްކުމާރު ސަންތޯޝީ ޑައިރެކްޓްކޮށް ގެނެސްދޭ ފިލްމު ރިލީޒްކުރާނެ ތާރީހެއް އަދި އިއުލާނެއް ނުކުރެ އެވެ.