މަޝްހޫރު ބަތަލާ ޕްރިޔަންކާ ޗޯޕްޅާ ހިއްސާވެގެން މީގެ ތިން އަހަރު ކުރިން އެމެރިކާގެ ނިއު ޔޯކްގައި "ސޯނާ" ގެ ނަމުގައި ހުޅުވި ރެސްޓޯރެންޓް މި މަހު އެއްކޮށް ބަންދު ކުރަން ނިންމައިފި އެވެ.
އެތަނުގެ އިންސްޓަގްރާމްގައި އާންމުކުރި ޕޯސްޓެއްގައި ބުނީ ތަން ބަންދުކުރަން ނިންމާފައި ވަނީ މި މަހުގެ 30 ގައި ކަމަށެވެ. އެހެންވެ "ސޯނާ" ގެ ކެއުންތައް ތަޖުރިބާކޮށްލަން ލިބޭނެ އެންމެ ފަހު ދުވަހަކީ އެއީ ކަމަށް ބުންޏެވެ. އެ ރެސްޓޯރެންޓުން ބުނީ ފާއިތުވި ތިން އަހަރުގެ ތެރޭގައި ވަރަށް ބަޔަކު އެތަނުން ހިދުމަތް ހޯދާފައިވާ ކަމަށާއި ގިނަ ބަޔަކަށް ހިދުމަތް ދެވުމަކީ ފަހަރެއްގެ ގޮތުގައި ދެކޭ ކަމަށެވެ.
ނަމަވެސް އިންޑިއާގެ ކެއުންތަކަށް ހާއްސަ ރެސްޓޯރަންޓް ބަންދު ކުރަން ނިންމި ސަބަބެއް ހާމަކޮށްފައެއް ނުވެ އެވެ.
"ސޯނާ" ގައި ބަންދު ބޯޑު އަޅުވަން ނިންމި އިރު، އެ ރެސްޓޯރަންޓްގައި އޮޮތް ޕްރިޔަންކާގެ ހިއްސާ އޭނަ މިދިޔަ އަހަރު ވަނީ ދޫކޮށްލައިފަ އެވެ. އެ ރެސްޓޯރަންޓަކީ ޕްރިޔަންކާ އާއި މަޝްހޫރު ޝެފެއް ކަމަށްވާ އިންޑިއާ ދަރިކޮޅުގެ އެމެރިކާގެ މަނީޝް ކޭ ގޯޝްއާ ހިއްސާވެގެން ހުޅުވި ތަނެކެވެ.
ބޮލީވުޑްގެ ފިލްމީ ތަރިން ނިއު ޔޯކަށް ކުރާ ދަތުރުތަކުގައި "ސޯނާ" ގެ ކެއުން ތަޖުރިބާކޮށް، އެތަނުގެ ހިތްގައިމުކަމުގެ ވާހަކަ ސޯޝަލް މީޑިއާގައި ވެސް ހިއްސާކޮށްފައިވެ އެވެ.