ތެލެގޫ ޑައިރެކްޓަރެއްގެ ފިލްމަކަށް ބޮލީވުޑްގެ ތަރި، ސަނީ ޑިއޯލް ސޮއިކޮށް އެ ފިލްމު މިއަދު އިއުލާންކޮށްފި އެވެ.
ނަން އަދި ހާމަނުކުރާ މި ފިލްމުގެ ވާހަކަ މިއަދު ސޯޝަލް މީޑިއާގައި ހިއްސާކޮށް ސަނީ ފިލްމު ސިފަކޮށްފައި ވަނީ "އިންޑިއާގެ އެންމެ ވަރުގަދަ އެކްޝަން ފިލްމު" ގެ ގޮތުގަ އެވެ.
އަންނަ ހޮނިހިރު ދުވަހު ޝޫޓިން ފަށަން ހަމަޖެހިފައިވާ ފިލްމުގެ ޑައިރެކްޓަރަކީ ކާމިޔާބު ތެލެގޫ ފިލްމުތަކެއް ގެނެސްދިން ގޯޕީޗަންދު މަލިނޭނީ އެވެ. "ޑޮން ސީނޫ" އާއި "ވިނާ" އަދި "ކްރެކް" ފަދަ ފިލްމުތައް ގެނެސްދިން ޑައިރެކްޓަރުގެ އެންމެ ފަހުގެ ފިލްމަކީ މިދިޔަ އަހަރުގެ "ވީރާ ސިމްހާ ރެޑީ" އެވެ.
ގޯޕީޗަންދު ދެން އެންމެ އަވަހަށް ގެނެސްދޭނީ ރަވީ ތޭޖާއާ އެކީ ހަދާފައިވާ ފިލްމެކެވެ.
މީޑިއާތަކުން ބުނީ ސަނީ އާއި ގޯޕީޗަންދުގެ ފިލްމުގެ ކާސްޓްގައި ސައްޔާމީ ކޭރް އާއި ރެޖީނާ ކެސަންޑްރާ ވެސް ހިމެނޭ ކަމަށެވެ. ފިލްމު ރިލީޒްކުރާނެ ތާރީހެއް އަދި ނުނިންމަ އެވެ.
ސަނީ ދާދި ފަހުން ވަނީ ޑައިރެކްޓަރު ރާޖްކުމާރު ސަންތޯޝީގެ "ލާހޯރް، 1947" ނިންމައިފަ އެވެ. އާމިރު ޚާން ޕްރޮޑިއުސްކޮށްފައިވާ ފިލްމު ސިނަމާތަކަށް ގެންނާނެ ތާރީހެއް އަދި އިއުލާނެއް ނުކުރެ އެވެ.
ސަނީގެ އެންމެ ފަހުގެ ފިލްމަކީ މިދިޔަ އަހަރުގެ އެންމެ ބޮޑު އެއް ހިޓް ކަމަށްވާ "ގަދަރު 2" އެވެ.