2023 ވަނަ އަހަރު 16 ނޮވެމްބަރާ ހަމައަށް ދިވެހިރާއްޖޭގެ ޖަލުތަކުން 434 މީހުން ދޫކޮށްފައިވާ ކަމާއި އޭގެތެރެއިން 331 މީހުންނަކީ މަސްތުވާތަކެތީގެ އެކި މައްސަލަތަކުގައި ޖަލަށްލާފައި ތިބި މީހުންކަން ހާމަވެއްޖެއެވެ.
ގިނަ އަދަދެއްގެ ކުށްވެރިންތަކެއް ކުރީގެ ސަރުކާރުން ދޫކޮށްލުމާ ގުޅިގެން، ކުށް ކުރުން އިތުރުވެފައިވާ ކަމަށް ފުލުހުންގެ ތަރުޖަމާނު، އެސިސްޓަންޓް ޕޮލިސް ކޮމިޝަނަރު އަހުމަދު ޝިފާން ވިދާޅުވީ އިއްޔެއެވެ. ޝިފާންވަނީ މީގެ 10 ވަރަކަށް މަސް ކުރިން 434 ކުށްވެރިން މުޖުތަމައަށް ދޫކޮށްލާފަވާކަން ހާމަކޮށްފައެވެ.
އިތުބާރު ހުރި މަސްދަރަކުން "އައްޑޫލައިވް" އަށް މައުލޫމާތު ދެމުން ބުނެފައިވަނީ، 1 ޖެނުއަރީ 2023 އިން 16 ނޮވެމްބަރ 2023 އަށް ހުކުމަށް އަދި ބަންދަށް ލުއިދީ 434 މީހުން ދިވެހިރާއްޖޭގެ ޖަލުތަކުން ދޫކޮށްފައިވާ ކަމަށެވެ. މީގެތެރެއިން އެންމެ ގިނައީ ކްލެމެންސީއާއި އަފުއާމްގެ ދަށުން ބަންދުން ދޫކޮށްފައިވާ މީހުންނެވެ.
ޖަލުތަކުން ދޫކޮށްފައިވާ މީހުން ދޫކުރެވުނު ގޮތް:
- ކްލެމެންސީއާއި އަފުއާމްގެ ދަށުން 290 މީހުން
- ޕެރޯލްގެ ދަށުން 53 މީހުން
- ގޭބަންދަށް ބަދަލު ކުރެވުނު 91 މީހުން
ޖަލުން މީހުން ދޫކޮށްފައިވާ ގޮތަށް ބަލާއިރު މައިގަނޑު 5 ކެޓަގަރީއަކަށް ކުށްވެރިން ބެހެއެވެ. އެއީ ޖިންސީ ކުށް، މަސްތުވާތަކެތީގެ ކުށް، ވަޔަލެންޓް ކްރައިމްސް، މުދަލާއި ފައިނޭޝަލް ކުށްތައް އަދި އެހެނިހެން ކުށްތަކެވެ. 1 ޖެނުއަރީ 2023 އިން 16 ނޮވެމްބަރ 2023 އަށް ހުކުމަށް އަދި ބަންދަށް ލުއިދީ ދޫކުރި 434 މީހުން މި ކެޓަގަރީތަކަށް ބެހޭގޮތަށް ބަލާއިރު:
- މަސްތުވާތަކެތީގެ ކުށްތައް: 331 މީހުން
- މުދަލާއި ފައިނޭޝަލް ކުށްތައް: 42 މީހުން
- ޖިންސީ ކުށްތައް: 27 މީހުން
- ވަޔަލެންޓް ކްރައިމްސް: 26 މީހުން
- އެހެނިހެން ކުށްތައް: 8 މީހުން
ކްލެމެންސީއާއި އަފުއާމްގެ ދަށުން ބަންދުން ދޫކޮށްފައިވާ މީހުންގެ ތެރެއިން އެންމެ ގިނައީ ވެސް މަސްތުވާތަކެތީގެ މައްސަލަތަކުގައި ބަންދު ކޮށްފައިތިބި މީހުންނެވެ.
ކްލެމެންސީ ދަށުން ޖަލުން ދޫކޮށްފައިވާ މީހުން؛ ޑްރަގްސް މައްސަލަތައް:
- މަސްތުވާތަކެތި ބޭނުންކުރުމުގެ ކުށުގައި: 170 މީހުން
- މަސްތުވާތަކެތި ވިޔަފާރިކުރުމުގެ ކުށުގައި: 4 މީހުން
- މަސްތުވާތަކެތި ޓްރެފިކް ކުރުމުގެ ކުށުގައި: 74 މީހުން
- މަސްތުވާތަކެތި ޕެޑްލް ކުރުމުގެ ކުށުގައި: 1 މީހަކު
ކްލެމެންސީއާއި އަފުއާމްގެ ދަށުން ޖަލުތަކުން ދޫކޮށްފައިވާ މީހުންގެ ތެރެއިން ދެން އެންމެ ގިނަ އަދަދަކަށް މީހުން ދޫކޮށްފައިވަނީ މުދަލާއި ފައިނޭޝަލް ކުށްތަކުގެ މައްސަލަތަކުގައި ޖަލުގައި ތިބި މީހުންނެވެ. އެގޮތުން ވައްކަމުގެ މައްސަލަތަކުގައި ޖަލުގައި ތިބި 14 މީހުން، މަކަރާއި ހީލަތުގެ މައްސަލަތަކުގައި ޖަލުގައި ތިބި 4 މީހުން، ހުއްދަނެތި މުދަލަށް ބާރު ހިންގުމުގެ ކުށުގައި ޖަލަށް ލާފައިހުރި 2 މީހުން އަދި މުދަލަށް ގެއްލުން ދިނުމުގެ ކުށުގައި ޖަލުގައި ހުރި މީހެއް ހިމެނެއެވެ.
މީގެއިތުރުން ކުޑަކުދިންނަށް ޖިންސީ ގޯނާ ކުރުމުގެ ކުށުގައި ޖަލުގައި ހުރި މީހަކާއި، ޖިންސީ ގޯނާ ކުރުމުގެ މައްސަލައެއްގައި ޖަލުގައި ހުރި މީހެއްގެ އިތުރުން އޮރިޔާން ކާޑު އުފެއްދުމުގެ މައްސަލައެއްގައި ޖަލުގައި ހުރި މީހަކުވެސް މި މުއްދަތުގައި ޖަލުން ދޫކޮށްފައިވެއެވެ. އަދި މާރާމާރީގެ މައްސަލަތަކުގައި ޖަލުގައި ތިބި 10 މީހަކާއި، އެހެންމީހެއްގެ ނަފުސަށް ގެއްލުން ދިނުމުގެ މައްސަލަތަކުގައި ޖަލުގައި ތިބި 2 މީހަކާއި، ޓެރަރިޒަމްގެ މައްއސަލައެއްގައި ޖަލުގައި ހުރި މީހަކާއި، ތޫނުހަތިޔާރު ގެންގުޅުމުގެ މައްސަލައެއްގައި ޖަލުގައި ހުރި މީހެއްގެ އިތުރުން ބިރުދެއްކުން އަދި މޭންސްލޯޓަރގެ މައްސަލައެއްގައި ޖަލުގައި ހުރި މީހަކުވެސް ކްލެމެންސީއާއި އަފުއާމްގެ ދަށުން ޖަލުތަކުން ވަނީ ދޫކޮށްފައެވެ. ހަމައެހެންމެ ދޮގު މައުލޫމާތު ދިނުމުގެ މައްސަލައެއްގައި ޖަލުގައި ހުރި މީހަކުވެސް ދޫކޮށްލާފައިވެއެވެ.
"އައްޑޫލައިވް"އަށް ލިބިފައިވާ މައުލޫމާތުތަކުން އެނގޭގޮތުން، 1 ޖެނުއަރީ 2023 އިން 16 ނޮވެމްބަރ 2023 އަށް ޕެރޯލްގެ ދަށުން 53 މީހަކު ޖަލު ތަކުން ދޫކޮށްފައިވެއެވެ.
ޕެރޯލްގެ ދަށުން ޖަލުތަކުން ދޫކޮށްފައިވާ މީހުން:
- މަސްތުވާތަކެތި ބޭނުންކުރުން، ވިޔަފާރި ކުރުން އަދި ޓްރެފިކް ކުރުމުގެ ކުށުގައި ޖަލުގައި ތިބި 46 މީހުން
- ތޫނުއެއްޗަކުން ހަމަލާ ދިނުން އަދި ޓްރެރިޒަމްގެ ކުށުގައި ޖަލުގައި ތިބި 3 މީހުން
- ޖިންސީ ކުށްތަކުގައި ޖަލުގައި ތިބި 2 މީހުން
- ވައްކަންކުރުމުގެ ކުށޫގައި ޖަލުގައި ތިބި 2 މީހުން
މީގެއިތުރުން 91 މީހަކު ވަނީ ޖަލުތަކުން ގޭބަންދަށް ބަދަލުކޮށްފައެވެ. އެގޮތުން މަސްތުވާތަކެތީގެ މައްސަލަތަކުގައި ޖަލުތަކުގައި ތިބި 36 މީހަކާއި، ޖިންސީ ކުށްތަކުގައި ޖަލު ތަކުގައި ތިބި 22 މީހަކާއި، މުދަލާއި ފައިނޭންޝަލް ކުށްތަކުގައި ޖަލުތަކުގައި ތިބި 19 މީހުން، ވަޔަލެންޓް ކްރައިމްސްގައި ޖަލުގައި ތިބި 7 މީހުން އަދި އެހެނިހެން ކުށްތަކުގައި ޖަލުގައި ތިބި 7 މީހަކުވެސް ގޭބަންދަށް ބަދަލުކޮށްފައިވެއެވެ.