މިދިޔަ އަހަރުގެ އޮގަސްޓްގައި އިއުލާންކުރި "ޑޮން 3" ގެ ޝޫޓިން ފަށަން ނިންމާފައި ވަނީ އަންނަ އަހަރު ކަމަށް ޑައިރެކްޓަރު ފަރުހާން އަޚްތަރު ބުނެފި އެވެ.
ރަންވީރު ސިންގް ޓައިޓްލް ރޯލު ކުޅެން ހަމަޖެހިފައިވާ ފިލްމުގެ ޝޫޓިން މި އަހަރުގެ އޮގަސްޓްގައި ފަށާނެ ކަމަށް ދާދި ފަހުން ބައެއް މީޑިއާތަކުން ރިޕޯޓްކޮށްފައިވެ އެވެ. ނަމަވެސް ޕިންކްވިލާ އަށް ދިން އިންޓަވިއުއްގައި ފަރުހާން ބުނީ "ޑޮން 3" ގެ ޝޫޓިން ފަށަން ޕްލޭންކޮށްފައި އޮތީ އަންނަ އަހަރު ކަމަށެވެ.
"ތައްޔާރީތައް ކުރިއަށް އެބަދޭ. މިއީ ވަރަށް ލުކްފޯވާޑް ކުރާ ޕްރޮޖެކްޓެއް." އޭނަ ބުންޏެވެ.
"ޑޮން 3" ގައި ރަންވީރާ އެކީ ބަތަލާގެ ރޯލު ކުޅޭނީ ކިއާރާ އަދުވާނީ އެވެ.
ރަންވީރާ އެކީ މި ފިލްމު ހަދަން ނިންމި އިރު، ފަރުހާން ޑައިރެކްޓްކުރި "ޑޮން" ގެ ކުރީގެ ދެ ބައިގެ ބަތަލަކީ ޝާހްރުކް ޚާނެވެ. އަދި ޕްރިޔަންކާ ޗޯޕްޅާ ބަތަލާގެ ރޯލު ކުޅުނު "ޑޮން" 2006 ގައި ގެނެސްދިނުމަށް ފަހު، "ޑޮން 2" ރިލީޒްކުރީ 2011 ގަ އެވެ.
ޝާހްރުކާ އެކީ ގެނެސްދިން "ޑޮން" ގެ ފުރަތަމަ ބަޔަކީ އަމީތާބް ބައްޗަން ޓައިޓްލް ރޯލު ކުޅުނު 1978 ގެ "ޑޮން" ގެ ރިމޭމެކެވެ. ރަމޭޝް ސިއްޕީ ޑައިރެކްޓްކުރި އެ ފިލްމު ހެދީ ފަރުހާންގެ ބައްޕަ ޖާވިދު އަޚްތަރާއި ސަލްމާން ޚާންގެ ބައްޕަ ސަލީމް ޚާންގެ ސްކްރީންޕްލޭއަކަށެވެ.
"ޑޮން 3" ގެ ޝޫޓިން އަންނަ އަހަރު ފަށަން ނިންމި އިރު، ފަރުހާން 2021 ގައި އިއުލާން ކުރި "ޖީ ލޭ ޒަރާ" ގެ ޝޫޓިން މި އަހަރުގެ ފަހުކޮޅު ފަށާނެކަމުގެ ވާހަކަތަކެއް މީޑިއާތަކުގައި ދެކެވިފައިވެ އެވެ. ނަމަވެސް މިއާ އަޕްޑޭޓެއް ފަރުހާން ނުދެ އެވެ. ތިން އަންހެން އެކުވެރިއެއްގެ ވާހަކަ ކިޔައިދޭނެ "ޖީ ލޭ ޒަރާ" ގެ ތަރިންނަކީ އާލިއާ ބަޓާއި ކެޓްރީނާ ކައިފްގެ އިތުރުން ޕްރިޔަންކާ ޗޯޕްޅާ އެވެ.