ވެރިރަށް މާލޭގެ ނަސަންދުރާ ޕެލެސް ހޮޓަލުގެ ކުރިމަތީގައި ދެތިން ގަޑި އިރު ވަންދެން މަޑުކޮށްލާށެވެ. އައްޑޫ އިން މާލެ އައި ރައްޔިތަކާ ދިމާ ނުވެއެއް ނުދާނެއެވެ. ކޮންކަމަކުތޯ މާލެ އައީ ސުވާލުކޮށްލަ ބަލާށެވެ؟
"މިއައީ މަންމަ ޑޮކްޓަރަށް ދައްކަން"، "ދަރިފުޅުގެ ޓެސްޓެއް ހަދާލަން" ނުވަތަ "އެކްސިޑެންޓްގައި އަނިޔާވި ކޮއްކޮގެ ސީޓީ ސްކޭން ހައްދަން" މި ނޫން ޖަވާބެެއް މާލެ އަންނަ 80 ޕަސެންޓް މީހުންގެ ފަރާތުން ނުލިބި ނުދާނެއެވެ.
ރާއްޖޭގެ އެންމެ ދެކުނުގައި އޮތް އައްޑޫ އަކީ މީގެ 40 އަހަރު ކުރިން އަމިއްލަ ހޮސްޕިޓަލެއް އެއަތޮޅުގައި ހުރެގެން ރާއްޖޭގެ އެކި ކަންކޮޅު ތަކުން ބޭސްފަރުވާ އަށް އައި މީހުންނަށް ހިދްމަތް ދިން ހިތްހެޔޮ ރައްޔިތެއް ދިރިއުޅޭ އަތޮޅެކެވެ.
ސ. ގަމުގައި އޭރު އިނގިރޭސިން ހިންގި ހޮސްޕިޓަލް ސަރުކާރުގެ އެންގުމަށް ބަންދުކުރުމަށް ފަހު ފާއިތުވެގެން ދިޔަ 40 އަހަރު ތެރޭގައި އައްޑޫގެ ރައްޔިތުން މިވަނީ ސިއްޙީ ޚިދުމަތަށް އެދި ސަލާން ޖަހަން ޖެހޭ ހިސާބަށް ގޮސްފައެވެ.
ސަރުކާރުތަކުން އައްޑޫގައި ހޮސްޕިޓަލް އަޅަން ފަށާ ވާހަކަ އާއި ހޮސްޕިޓަލް ކުރަހާ ވާހަކަ ދައްކާތާ މިހާރު 15 ވަރަކަށް އަހަރު މިވަނީ އެވެ. ރައީސް ނަޝީދެކޭ ރައީސް މައުމޫނެކޭ ރައީސް ޔާމީނެކޭ ރައީސް ވަހީދެކޭ އައްޑޫ މީހުންނަށް ތަފާތެއް ނެތެވެ. ކޮންމެ މީހަކުވެސް ދައްކަނީ ހޮސްޕިޓަލެއް އަޅާނެ ވާހަކައެވެ. އެހޮސްޕިޓަލް އެޅޭނެ ދުވަހެއް އަދި އައްޑޫގެ ރައްޔިތުންނަކަށް ނުފެނެއެވެ. ރައީސް ޔާމިނު ވެސް 2017 ގައި ހޮސްޕިޓަލް ހުޅުވޭނެ ކަމަށް ބުނެފިއެވެ. އައްޑޫގެ ރައްޔިތުންނަށް އޮތީ އިންތިޒާރު ކުރުމެވެ.
ބައެއް މީހުންގެ ނަޒަރުގައި "މާލޭ މީހުން އައްޑޫ އަށް ކަމެއް ވިޔަ ނުދޭން އުޅެނީ" އެވެ. ނަމަވެސް އަޅުގަނޑު ޤަބޫލުކުރާގޮތުގައި އައްޑޫގެ މީހުންގެ ތެރެއިން އައްޑޫ އަށް ކަންކޮށްދެވޭ ހިސާބުގައި ތިބި މީހުން ކަން ނުކުރަނީއެވެ. ވަކި ބަޔަކު ބޮލުގައި އިލްޒާމް އެޅުވުމުގެ ބޭނުމެއް ނެތެވެ.
ހޮސްޕިޓަލްގެ މައްސަލައިގައި ރައްޔިތަކު އެއްޗެކޭ ބުނެފި ނަމަ ސަރުކާރުގެ މެންބަރުން ބުނާނެއެވެ. "ކަލޭމެން ތިއުޅެނީ ނަފްރަތު އުފައްދަންވެގެންނެވެ. ތަރައްޤީ ގެންނާތީ ހަޖަމު ނުވަނީއެވެ".
ރައްޔިތުންގެ ހިތުގައި އުފެދޭ ސުވާލުތައް ރައްޔިތުންނަށް ޚިދުމަތް ކުރުމަށް ﷲ ގަންދީ ހުވާކޮށްގެން ތިބޭ އަމިއްލައަށް ތިމަންނާ މެންނީ އިއްޒަތްތެރި މެންބަރުންނޭ ބުނާ ބަޔަކު ތިބި މަޖިލީހަކަށް ހުށަހެޅުމުން "ކަލޭމެން މަސައްކަތް ކުރަނީ ސަރުކާރާ މެދު ނަފްރަތު އުފައްދަން ވެގެންނޭ" ބުނުމަކީ ރައްޔިތުންގެ އަޑު އަހަން އެމީހުން ބޭނުން ނުވާކަމުގެ ހެއްކެކެވެ.
އައްޑޫގައި އަޅަން ކިޔާތާ އެތައް އަހަރެއް ވެފައިވާ 100 އެނދުގެ ހޮސްޕިޓަލްގެ ވާހަކަ "އައްޑޫލައިވް"ގައި ޖެހީ ލިބުނު މައުލޫމާތުގެ ސައްޙަ ކަމުންނެވެ. ޑިމްކްރަސީގެ އެންމެ ބާރުގަދަ ފަރާތެއްގެ ގޮތުގައި އޮވެ "އައްޑޫލައިވް"އިން މަސައްކަތް ކުރަމުން މިދަނީ ސަރުކާރު ޖަވާބުދާރީ ކުރުވައި ރައްޔިތުންގެ ހިތުގައިވާ ސުވާލުތަކަށް ޖަވާބު ހޯދައި ދިނުމަށެވެ.
"އައްޑޫ ރައްޔިތުން ބޭސް ސިޓީއަށް ސަލާން ޖެހުން" ހުއްޓެން އޮތީ އަމިއްލަ ވަޒަނުގައި ތިބެ ބޭސްފަރުވާ ކުރެވޭނެ އިންތިޒާމެއް ހަމަޖެހިގެންނެވެ. ރާއްޖޭގެ އެންމެ ގިނަ ޑޮކްޓަރުން ނިސްބަތްވަނީ އައްޑޫއަށެވެ. އެފަދަ ޑޮކްޓަރުންނަށް އަމިއްލަ ވަޒަނުގައި ތިބެގެން ހިދްމަތް ދެވޭނެ އިންތިޒާމް ހަމަޖެހެން އެބަޖެހެއެވެ.
އައްޑޫގެ ހޮސްޕިޓަލްގެ މައްސަލާގައި ހެލްތު މިނިސްޓަރު ޖަވާބުދާރީ ކުރުމަށް ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމެޓީއަށް ހުށަހެޅުމުން ހުޅުދޫ ދާއިރާގެ މެމްބަރު މުހައްމަދު ޝާހިދް (ޝާޑް) ދެއްކެވި ވާހަކަފުޅަކީ ހިތާމަ ހުރި ވާހަކަތަކެވެ. މިނިސްޓަރުން ގެނެސް އެބޭފުޅުންގެ ވަގުތު ބޭކާރު ކުރުމުގެ ބޭނުމެއް ނެތްކަމަށް ޝާޑް ވިދާޅުވިއިރު އަދިވެސް ހޮސްޕިޓަލްގެ ކަންކަމާއި ސަރުކާރުން ރަސްމީ ވާހަކައެއް ނުދައްކަވައެވެ. ބުނިހާވެސް އެއްޗަކީ މަސައްކަތް ނުހުއްޓޭ ކަމަށެވެ.
އައްޑޫ ރައްޔިތުންގެ އެތައް ހާސް ބައެއްގެ އުންމީދުގައި މިއަދު ޝާޑް ކޮޅުފައިން ޖެއްސެވިއިރު، ވަޒީރުންގެ ޒިއްމާތަކާއި މެމްބަރުންގެ ޒިއްމާ ނޭގުމަކީ ހިތާމަ ހުރި ކަމެކެވެ.
އާމްދަނީ ލިބޭ ވަސީލަތްތައް މަދު އައްޑޫގެ ރައްޔިތުން ކޮންމެ ދުވަހަކު ބޮޑު ހަރަދެއްކޮށް ބޭސް ފަރުވާއަށް މާލެ ދާން ޖެހޭ ޖެހުމަށް ހައްލެއް ހޯދައި ދިނުމަށް މިވަގުތު އައްޑޫއަށް ނިސްބަތްވާ ހުރިހާ މެމްބަރުންވެސް އެއް ރޫހެއްގައި މަސައްކަތް ކުރަން ޖެހެއެވެ.
"އައްޑުލައިވް" އިން ފަތުރަނީ ދޮގު ހަބަރުކަމަށް ޝާޑް ވިދާޅުވިއަސް، ހޮސްޕިޓަލްގެ މަސައްކަތް ހުއްޓިފައިވާކަން އައްޑޫ ރައްޔިތުންނަށް ފެނެއެވެ. އަދި ކުރެހި ކުރެހުމަށް އިތުރު 18 މިލިއަން ޑޮލަރު ހޯދަން ޖެހޭއިރު، ބަހަނާ ނުދައްކައި ސަރުކާރު މެދުވެރިކޮށް އެފައިސާ ހޯދައި، ވީ އެންމެ އަވަހަކަށް ހޮސްޕިޓަލްގެ އަމަލީ މަސައްކަަތް ފައްޓަވައި ދެއްވާށެވެ.
އަޅުގަނޑުމެން އެކަމަށް ޝާޑް އާއި ދެންވެސް އެމަސައްކަތުގައި އުޅުއްވާ އެންމެހާ މެމްބަރުންނަށް ހައްްގު ޝުކުރު ދޭނަމެވެ.