މިހާރު ކުށް ކުށްކުރުން އިތުރުވެފައި ވަނީ ކުރީގެ ސަރުކާރުން އުސޫލެއް ނެތި ދޫކުރި ގިނަ އަދަދެއްގެ ކުށްވެރިންގެ ސަބަބުން ކަމަށް ވިދާޅުވެ ފުލުހުންގެ ތަރުޖަމާނުގެ މަގާމުގައި ހުންނެވި އެސިސްޓަންޓް ޕޮލިސް ކޮމިޝަނަރު އަހުމަދު ޝިފާމް ދެއްކެވި ވާހަކަތަކާ ގުޅިގެން ކުރީގެ ޕޮލިސް ކޮމިޝަނަރު މުހައްމަދު ހަމީދު ކަންބޮޑުވުން ފާޅުކުރައްވައިފި އެވެ.
ރައީސް އިބްރާހީމް މުހައްމަދުގެ ސަރުކާރުގެ ޕޮލިސް ކޮމިޝަނަރު ވިދާޅުވީ ޝިފާން ދެއްކެވީ މަގާމާ ނުބައްދަލު ވާހަކައެއް ކަމަށާއި އެފަދަ ޒިންމާދާރުކަން ކުޑަ ވާހަކައެއް ދެއްކުމަކީ ފުލުހުންގެ މުއައްސަސާ ތަމްސީލުކުރައްވާ ތަރުޖަމާނަކު ދައްކަވަންވާ ޒާތުގެ ވާހަކައެއް ނޫން ކަމަށެވެ.
ޝިފާންގެ ވާހަކަ ހަމީދު ސިފަކުރެއްވީ މިހާރު ވެސް ހީނަރުވެފައިވާ އެ މުއައްސަސާގެ އަދުލުވެރިކަމާއި ޕްރޮފެޝަނަލިޒަމަށް ރައްޔިތުންގެ އިތުބާރާއި ޔަގީންކަން ގެއްލިގެންދާނެ ކަމެއްގެ ގޮތުގަ އެވެ.
އޭނަ ވިދާޅުވީ ބޮޑެތި ކުށްތަކުގައި ދައުވާ ލިބޭ އަދި ތަކުރާރުކޮށް ކުށްކުރާ މީހުން ޝަރުއީ ބަންދުން ދޫކޮށްލުމުގައި ނުވަތަ ޕެރޯލާއި މައާފު ދިނުމުގައި ސަރުކާރުތަކުން ނުފޫޒު ފޯރުވުމަކީ މައްސަލައެއް ކަމަށާއި. ކޮންމެ ސިޔާސީ ޕާޓީއެއް ވެރިކަމުގައި އޮތަސް ރާއްޖޭގައި އެކަން އާދައަކަށް ވެފައިވާ ކަމަށެވެ.
"ކުށްކުރާ މީހުން އަބަދުވެސް ތިބެންޖެހޭނީ ޖަލުގައި ކަމަށް ގަބޫލު ކުރުމަކީ ފުށުއަރާ ވިސްނުމެއް،" ހަމީދު ވިދާޅުވި އެވެ. "ޕެރޯލާއި މައާފް ދިނުމަކީ ގާނޫނީ މަރުހަލާގެ ތެރޭގައި ހިމެނޭ އެކަމަކު ޒިންމާދާރުކަމާ އެކީގައި ތަންފީޒު ކުރަން ޖެހޭ ކަމެއް."
ނަމަވެސް ގާނޫނު ތަންފީޒު ކުރުމަކީ ގޮންޖެހުން ބޮޑު މަސައްކަތެއްކަން ފާހަގަކުރައްވައި އޭނަ ވިދާޅުވީ އަމާޒު ހިފަން ވާނޫ އެހެން މީހުންނަށް އިނގިލި ދިއްކުރުމުގެ ބަދަލުގައި ހުރަސްތަކާ އެކީ ވެސް އަމިއްލަ ނަފްސު ޖަވާބުދާރީ ކުރުވައި އެ ހުރަސްތަކުން އަރައި ގަނެވޭނެ ގޮތްތައް ހޯދަން ކަމަށެވެ.
ހަމީދު ވިދާޅުވި ގޮތުގައި ވަކިވަކި އިސް އޮފިސަރުން ނުވަތަ މުއައްސަސާ ތަމްސީލުކުރައްވާ ބޭފުޅުން ނުހައްގުން އަމަލު ކުރުމަކީ މާޔޫސްވާ ކަމެކެވެ. އަދިއެއީ ނުރައްކާތެރި އަދި ރައްޔިތުންގެ ހިމާޔަތުގައި އޮތް މުއައްސަސާއަކަށް އިތުރު ގެއްލުމެއް ލިބުމުގެ މަގު ފަހިކޮށްދޭ ކަމެއް ކަމަށް ވިދާޅުވި އެވެ.
"އެންމެ ބޮޑު ކަންބޮޑުވުމަކީ، ރައްޔިތުންނަށް ހިދުމަތްދޭ މުއައްސަސާތަކުގެ ތެރޭގައި، އަދި އެންމެ މަތީ ފަންތީގައިވެސް، މިދެންނެވި ފަދަ ފަރާތްތައް ޖަވާބުދާރީ ކުރުވުމުގެ އިހްލާސްތެރިކަން ނެތުން." އޭނަ ވިދާޅުވި އެވެ.
ޝިފާން ވިދާޅުވެފައިވާ ގޮތުގައި މިހާރު ރާއްޖޭގައި ކުށް ކުރުން އިތުރުވެފައި ވަނީ، ވަކިން ހާއްސަކޮށް މާލެ ސަރަހައްދުގައި ކުށްކުރުން އިތުރުވެފައި ވަނީ މީގެ 10 ވަރަކަށް މަސް ކުރިން 434 ކުށްވެރިން މުޖުތަމައު އަށް ދޫކޮށްލާފައިވާތީ ކަމަށެވެ. އަދި އެ މީހުން ދޫކޮށްލީ މޮނިޓާކުރެވޭނެ ހަރުދަނާ ނިޒާމެއް ވެސް ނެތި ކަމަަށް ވިދާޅުވި އެވެ.
ޝިފާންގެ އެ ވާހަކަ ގިނަ ބަޔަކު ސިޔާސީ ވާހަކައެއްގެ ގޮތުގައި ސިފަކޮށް، ވަރަށް ބޮޑަށް ފާޑު ކިޔާފައިވެ އެވެ.