ކުރިން ވެސް ބިރުވެރި ފިލްމުތަކެއް ގެނެސްދީފައިވާ މަޝްހޫރު އެކްޓަރު/ޑައިރެކްޓަރު ޔޫސުފް ޝަފީއު (ޔޫއްޕެ) އަނެއްކާ ވެސް އެ ޖޯންރާގެ ފިލްމެއް ގެނެސްދޭން ތައްޔާރުވެއްޖެ އެވެ.
މިހާރު ޕޯސްޓަރުތަކެއް ވެސް ދައްކާލާފައިވާ މި ފިލްމަކީ އޭނަގެ ސްކްރީންޕްލޭއަކަށް ޑައިރެކްޓްކޮށް މުހިއްމު ރޯލެއް ވެސް ކުޅެފައިވާ "ސާޔާ" އެވެ. ޕްރޮޑިއުސަރު އިސްމާއީލް ޝަފީއުގެ ޝައި ޕްރޮޑަކްޝަނާއި ޔޫއްޕެ ޕްރޮޑަކްޝަން ގުޅިގެން ގެނެސްދޭ ފިލްމުގެ މައިގަނޑު ކާސްޓްގައި ދެން ހިމެނީ އައިމިނަތު ރަޝްފާ (އާޝާ) އާއި އިބްރާހީމް ޖިހާދު (ޖިމީ) އެވެ.
އޮގަސްޓް މަހުގެ 7 ގައި އޮލިމްޕަހަށް ގެންނަން ނިންމާފައިވާ މި ލޯބީގެ ބިރުވެރި ފިލްމުގެ އިތުރު ކާސްޓުންގެ ތެރޭގައި އަހުމަދު ނިމާލާއި މުހައްމަދު މަނިކު ވެސް ހިމެނެ އެވެ.
ޔޫއްޕެ އެންމެ ފަހުން ގެނެސްދިން ބިރުވެރި ފިލްމަކީ މިދިޔަ އަހަރުގެ "ކަޅަކި" އެވެ. އޭނަ ކުރިން ހެދި ބިރުވެރި ފިލްމުތަކުގެ ތެރޭގައި "ދައުވަތު" އާއި "އެ ދަތުރު" ހިމެނެ އެވެ.
"ސާޔާ" އޮގަސްޓް 7 ގައި ބެލުންތެރިންނަށް ގެނެސްދޭން ނިންމި އިރު، ޑައިރެކްޓަރު ހުސައިން މުނައްވަރު (ކިޑް) ގެ "ކަމަނާ" އެ މަހުގެ 27 ގައި އޮލިމްޕަހަށް ގެންނަން އޮތީ ނިންމައިފަ އެވެ. އަހުމަދު މަހުދީގެ ސްކްރީންޕްލޭއަކަށް ހަދާފައިވާ މި ފިލްމުގެ ތަރިންނަކީ ޔޫއްޕެ އާއި އާޝާގެ މަރިޔަމް އައްޒަ އެވެ.
އޮލިމްޕަހުގައި އެންމެ ފަހުން ދެއްކީ މުހައްމަދު ނިޔާޒު (ޓެޑްރީ) ގެ "ލަސްވިޔަސް" އެވެ. އެއީ މި އަހަރު އެޅުވި ފަސް ވަނަ ފިލްމެވެ.