ޕާކިސްތާންގެ މަޝްހޫރު ތަރިން ކަމަށްވާ ފަވާދު ޙާނާއި ސަނަމް ސައީދުގެ އާ ވެބް ސީރީޒް "ބަރުޒަޚް" އަންނަ މަހުގެ 19 ގައި ޕްރީމިއާ ކުރަން ނިންމައި އޭގެ ޕޯސްޓަރުތަކެއް ވެސް ދައްކާލައިފި އެވެ.
އަސަރު ގަދަ ލޯބީގެ ވާހަކައެއް ކިޔައިދޭނެ ސީރީޒް ބެލުންތެރިންނަށް ދޫކޮށްލަން ހަމަޖެހިފައި ވަނީ އިންޑިއާގެ ދެ ސްޓްރީމިން ޕްލެޓްފޯމެއް ކަމަށްވާ ޒީ5 އާއި ޒީ ޒިންދަގީގެ ޔޫޓިއުބް ޗެނެލުންނެވެ.
ދެހާސް ބާވީހުގެ ތެރޭގައި މަސައްކަތް ފެށި "ބަރުޒަޚް" ލިޔެ، ޑައިރެކްޓްކުރީ 2020 ގައި ޒީ5 އިން ގެނެސްދިން ސީރީޒް "ޗުރައިލްސް" ގެ ވެސް ހެދި އާސިމް އައްބާސީ އެވެ.
ފަވާދާއި ސަނަމް އެކީީގައި ސީރީޒަކުން ބެލުންތެރިންނާ ބައްދަލު ކުރަން ކުޑަތަންވަމުބް އަންނަ އިރު، މި ދެ ތަރިން އެކީގައި ކުރިން ވަރަށް ކާމިޔާބު ޓީވީ ސިލްސިލާއެއް ކުޅެފައިވެ އެވެ. އެއީ ހަމް ޓީވީން 2012-2013 އަށް ގެނެސްދިން "ޒިންދަގީ ގުލްޒާރު ހޭ" އެވެ.
ފަވާދާއި ސަނަމް މިހާރު އަންނަނީ އިތުރު ސީރީޒެއްގެ މަސައްކަތް ވެސް ކުރަމުންނެވެ. އެއީ ސޮނީ ލިވް އެޕަށް ހަދާ "ޝަންދޫރު" އެވެ. މީގެ މަސައްކަތް ފެށީ މިދިޔަ މަހުގެ ތެރޭގަ އެވެ.
ގިނަ ބަޔަކު މިހާރު އަންނަނީ "ބަރުޒަޚް" ގެ ޓްރެއިލާ އަށް އިންތިޒާރު ކުރަމުންނެވެ.