މި އަހަރުގެ ހައްޖުގެ އަޅުކަން އަދާކުރެއްވުމަށް ފަހު އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު މާލެ ވަޑައިގެންފި އެވެ.
ހައްޖަށް މިނިސްޓަރު ފުރާވަޑައިގަތީ މި މަހުގެ 11 ގަ އެވެ.
މި އަހަރު ރާއްޖެ އިން 1،150 މީހުން ހައްޖަށް ދިޔަ އެވެ. އަދި ހުރިހާ އެންމެން ވެސް ހައްޖަށް ދިޔައީ ހައްޖު ކޯޕަރޭޝަންގެ ހަވާލުގަ އެވެ. މި އަހަރު އަމީރުލް ހައްޖަކީ އެޑިއުކޭޝަން މިނިސްޓަރު ޑރ. އަހުމަދު ޝަފީއު އެެވެ.
ދިވެހި ހައްޖާޖީން ރާއްޖެ އަންނަ ފަށާނެ ދުވަހެއް ހައްޖު ކޯޕަރޭޝަނުން އަދި ހާމައެއް ނުކުރެ އެވެ. ރާއްޖެ އިން ހައްޖަށް ދިޔަ މީހުން ފުރީ ހަތަރު ދުވަހެއްގެ މަތިންނެވެ.
ޝަހީމު ހައްޖު ދަތުރު ނިންމަވާލައްވައި ރާއްޖެ ވަޑައިގެންނެވި އިރު، އިއްޔެ ވިދާޅުވެފައި ވަނީ މި އަަހަރުގެ ހައްޖު އޮޕަރޭޝަން ވަރަށް ކާމިޔާބު ކަމަށާއި ރަނގަޅު ކުރަން ޖެހޭ ކަންތައްތަކެއް ވެސް ފާހަގަކުރެވިފައިވާ ކަމަށެވެ. އެހެންވެ ކުރިއަށް އޮތް ތަނުގައި އެކަންކަން ރަނގަޅު ކުރައްވާނެ ކަމަށެވެ.