ރާއްޖެ އިން މި އަހަރު ހައްޖަށް ދިޔަ މީހުން އެނބުރި އަންނަން ފަށާނީ އަންނަ ހޯމަ ދުވަހުން ފެށިގެން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިނިސްޓަރު ހައްޖުގެ އަޅުކަމަށް ފަހު މިއަދު ރާއްޖެ ވަޑައިގެން ވިދާޅުވީ ދިވެހި ހައްޖާޖީން ރާއްޖެ އަންނާނީ ހަތަރު ދުވަސް މަތިން ކަމަށެވެ. އެގޮތުން ފުރަތަމަ ގްރޫޕް ހޯމަ ދުވަހު އަންނަން ހަމަޖެހިފައިވާ އިރު، ދެވަނަ ގްރޫޕް އަންނާނީ މި މަހުގެ
28 ގަ އެވެ. އަދި ތިން ވަނަ ގްރޫޕް އަންނަ މަހުގެ 1 ގައި އަންނަ ގޮތަށް ހަމަޖެހިފައިވާ އިރު، ފަހު ގްރޫޕް އަންނާނީ އަންނަ މަހުގެ 4 ގަ އެވެ.
ރާއްޖެ އިން މި އަހަރު 1،150 މީހުން ހައްޖަށް ދިިޔަ އެވެ. އެންމެން ވެސް ހައްޖަށް ދިޔައީ ހައްޖު ކޯޕަރޭޝަންގެ ހަވާލުގަ އެވެ. ހައްޖަށް ދިޔަ މީހުންގެ ތެރެއިން ދުވަސްވީ އަންހެނަކު ނިޔާވެފައިވާ އިރު، މި ވަގުތު އެކަކަށް ހޮސްޕިޓަލުގައި ފަރުވާ ދެމުން އަންނަ ކަމަށް ޝަހީމު ވިދާޅުވި އެވެ.
އަދި އާންމު ގޮތެއްގައި ޙައްޖުވެރިންގެ ހާލު ރަނގަޅު ކަމަށް ވެސް މިނިސްޓަރު ވިދާޅުވި އެވެ.