ތ. ވޭމަންޑޫގައި ގަވާއިދާ ހިލާފަށް ސައިކަލް ދުއްވި ޒުވާނަކު ހުއްޓުވާ ޖޫރިމަނާކޮށް ސައިކަލް ޓޯކުރި މައްސަލައިގައި ފުލުހުން އަމަލުކުރި ގޮތާއިމެދު އާއިލާގެ ފަރާތުން ކަންބޮޑުވުން ފާޅުކޮށްފައިވާތީ އެ މައްސަލަ އިތުރަށް ބަލަމުން އަންނަ ކަމަށް ފުލުހުން ބުނެފި އެވެ.
ފުލުހުން ބުނީ މި މަހުގެ 12 ވަނަ ދުވަހު ވޭމަންޑުގައި މީހަކު ހުއްޓުވާފައި ވަނީ ފުލުހުން ބަންދުކޮށްފައިވާ ސަރަހައްދަކަށް ސައިކަލުގައި ވަނުމަށް ފަހު ނުކުމެގެން ދަނިކޮށް ކަމަށެވެ. އަދި މީހާ ހުއްޓުވައި ބެލިބެލުމުން އޭނަ އަތުގައި ލައިސަންސް ނެތްކަން އެނގުނު ކަމަށް ފުލުހުން ބުންޏެވެ.
އެހެންވެ ލައިސެންސް ނެތި ސައިކަލު ދުއްވުމުގެ ކުށުގައި ސައިކަލު ދުއްވި މީހާ ޖޫރިމަނާކުރުމަށް ފަހު ސައިކަލު ޓޯކުރީ 15 ދުވަހަށް ކަމަށް ފުލުހުން ބުންޏެވެ.
އެކަމާ ގުޅިގެން އާއިލާ އިން ބުނެފައި ވަނީ 18 އަހަރުގެ ކުއްޖަކާ ފުލުހުން ބޭއަދަބީކޮށް ވާހަކަ ދެއްކުމުން އެކަން ބަލައި ނުގަނެވޭނެ ކަމަށެވެ.