މި ސަރުކާރުން ގދ. ތިނަދޫ ފަޅު ހިއްކައިގެން އަޅަން ނިންމި އެއާޕޯޓުގެ އަމަލީ މަސައްކަތް ފެށުން ލަސްވާތީ ކައުންސިލުން ކަންބޮޑުވުން ފާޅުކޮށްފި އެވެ.
ދައުލަތުގެ މީޑިއާ، ޕީއެސްއެމްގައި ތިނަދޫގެ މޭޔަރު ސައުދު އަލީ ވިދާޅުވީ ތިނަދޫ ސަރަހައްދުގައި އިންޓަނޭޝަނަލް އެއާޕޯޓެއް ގާއިމްކުރުމަށް ރައީސް ޑރ. މުޙައްމަދު މުއިއްޒުގެ އިތުރުން ކުރީ ސަރުކާރުގެ ރައީސް އިބްރާހިމް މުޙައްމަދު ޞާލިހު ވެސް ވައުދުވެވަޑައިގެންނެވި ކަމަށެވެ.
އަދި މިކަމަކީ މިހާރުގެ ރައީސްގެ ގަރާރަކުން ނިންމާފައިވާ ކަމެއް ކަމަށް ވެސް އޭނަ ވިދާޅުވި އެވެ.
"ދެރަވާ ކަމަކީ އެއާޕޯޓުގެ އަމަލީ މަސައްކަތް ފެއްޓޭނެ ދުވަހެއް ފައްޓާނެ ދުވަހެއް ވެސް މަސައްކަތް ގޮސްފައި އޮތް ހިސާބެއް ވެސް ރައްޔިތުންނަށް ސާފެއް ނުވޭ." ސައުދު ވިދާޅުވި އެވެ.
އޭނަ ވިދާޅުވީ ކައުންސިލުން މަސައްކަތް ކުރަނީ އެ މަޝްރޫއުގެ މަސައްކަތް ވީހާ ވެސް އަވަހަކަށް ފެށޭނެ ގޮތެއްވޭތޯ ސަރުކާރާ މަޝްވަރާ ކުރަން ކަމަށެވެ. އަދި ތިނަދޫ އެއާޕޯޓުގެ މަސައްކަތް ފެށޭ ދުވަހަކީ އެ ރަށުގައި ހުރި ބިންތައް ޓޫރިޒަމަށް ހުޅުވައިލާނެ ދުވަސް ކަމަށް ވެސް މޭޔަރު ވިދާޅުވި އެވެ.
ތިނަދޫގައި އިންޓަނޭޝަނަލް އެއާޕޯޓެއް އަޅަން އެއްބަސްވުމެއްގައި ސޮއިކޮށްފައި ވަނީ މި އަހަރުގެ ފެބްރުއަރީ މަހުގެ 20 ގަ އެވެ.
ތިނަދޫގެ ފަޅު ހިއްކައިގެން ކުރިއަށް ގެންދަން ނިންމާފައިވާ އެ މަޝްރޫއު ކޮންސްޓްރަކްޝަން މިނިސްޓފްރީން ހަވާލުކޮށްފައި ވަނީ ތައިލޭންޑުގެ ޕޭން ޕެސިފިކް ކުންފުންޏާ އެވެ. ދެ އަހަރުތެރޭ ނިންމަން އަމާޒު ހިފާފައިވާ މި މަޝްރޫއަކީ އިންވެސްޓަރުގެ ޚަރަދުގައި ހިންގުމަށް ހަމަޖެހިފައިވާ މަޝްރޫއެކެވެ.
ތިނަދޫ އިންޓަނޭޝަނަލް އެއާޕޯޓް ތަރައްގީ ކުރަން ހަމަޖެހިފައި ވަނީ އެންމެ ބޮޑެތި ބޯޓު ޖެއްސޭ ފެންވަރަށެވެ. އަދި ޕްރިމިއަމް ފްލައިން ސްކޫލެއް ގާއިމްކުރުމާއި ފިއުލް ފާމެއް ގާއިމްކުރުމާއި، ކާގޯ ޚިދުމަތް ގާއިމުކުރުމުގެ އިތުރުން ސީޕްލޭން ހަބެއް ވެސް ގާއިމްކުރާނެ ކަމަށް ބުނެފައިވ އެވެ.
މި މަޝްރޫއުގެ ދަށުން ކޮންޓްރެކްޓަރު 12 ރިސޯޓެއް ތަރައްގީ ކުރާނެ ކަމަށާއި އެއީ 2،400 އަށް ވުރެ ގިނަ އެނދު ކަމަށް ސަރުކާރުން ބުނެފައިވެ އެވެ. ސަރުކާރުން ވަނީ މިއީ މިހާތަނަށް ހުވަދޫގައި ހިންގާ އެންމެ ބޮޑު ޕްރޮޖެކްޓް ކަމަށާއި މި ޕްރޮޖެކްޓާއެކު މުޅި ހުވަދޫ ބަދަލުކޮށްލާނެ ކަމަށެވެ.