އައްޑޫ ސިޓީ ހިތަދޫ ބޮޑު މަގުގައި ޕިކަޕަކާއި ސައިކަލެއް ޖެހި ނުރައްކާތެރި އެކްސިޑެންޓެއް ހިނގައި އަނިޔާވި މީހަކަށް ހިތަދޫ ރީޖަނަލް ހޮސްޕިޓަލްގެ އައިސީޔޫގައި ފަރުވާ ދެމުން އެބަގެންދެއެވެ..
މައުލޫމާތު ލިބިފައިވާ ގޮތުގައި މި އެކްސިޑެންޓް ހިނގާފައި ވަނީ ޕިކަޕް ގޯޅި އަޅަން އުޅުމުގެ ތެރޭގައި ބާރު ސްޕީޑްގައި ދުއްވާފައި އައި ސައިކަލް ޕިކަޕުގައި ޖެހިގެންނެވެ.
މިއެކްސިޑެންޓްގައި 3 މީހަކަށް ވަރަށް ބޮޑަށް އަނިޔާވެފައިވާ އިރު 3 މީހުންނަށް ވެސް މިހާރު ވަނީ ހިތަދޫ ރީޖަނަލް ހޮސްޕިޓަލުގައި ފަރުވާ ދޭން ފަށާފައެވެ.
މަންޒަރުދުށް މީހަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި ޒަޚަމްވީ ހިތަދޫ 2 ޒުވާނަކާއި ބިދޭސީއެކެވެ.އެކްސިޑެންޓް ހިނގި ވަގުތު ޕިކަޕު ދުއްވަން އިން ބިދޭސީ މީހާގެ އެއް އަތް ވަނީ ބިންދައިގެން ގޮސްފައެވެ.
އެކްސިޑެންޓްގައި ޒަޚަމްވެފައިވަނީ ސ.ހިތަދޫ ޚަރީފީގެ އަބްދުﷲ ނަވީން އާއި ސ.ހިތަދޫ ވެސްނޫގަސްސޮށުގޭ ހުސައިން ރިޔާޒެވެ. ނަވީންގެ ބޮލަށާއި ފަޔަށް އަނިޔާވެފައިވާއިރު ހާލު ސީރިއަސް ނޫން ކަމަށާއި ދެން ޒަޚަމްވި ހުސެން ރިޔާޒްގެ ކަރަށް އަނިޔާވެފައިވާ އިރު އޭނާގެ ހާލު ސީރިއަސް ކަމަށާއި އޭނާ އަށް މިވަގުތު ފަރުވާ ދެމުން އަންނަނީ އައިސީޔޫގައި ކަމަށް ޑޮކްޓަރުންނާއި ހަވާލާދީ ހޮސްޕިޓަލުގެ އޮފިޝަލަކު ވަނީ 'އައްޑޫލައިވް' އަށް މައުލޫމާތު ދީފައެވެ.
މި އެކްސިޑެންޓްގެ މައްސަލަ ހިތަދޫ ޕޮލިސް ސްޓޭޝަނުން ގެންދަނީ ތަހުގީގްކުރަމުންނެވެ.