ކެނަބިސް ޓްރެފިކްކުރި މައްސަލައަކާ ގުޅިގެން އައްޑޫ ހިތަދޫ މުހައްމަދު އުބާދަތު ހުސައިން ހޯދަން ފުލުހުން ތިން ވަަނަ ފަހަރަށް އިއިލާންކޮށްފި އެވެ.
ހިތަދޫ ހަޒާރުމާގޭ އުބާދަތު، 29، ހޯދަން ފުލުުހުން ފުރަތަމަ އިއުލާންކުރީ މިދިޔަ މަހުގެ 12 ގަ އެވެ. އޭގެ ފަހުން މި މަހުގެ 2 ވަނަ ދުވަހު ވެސް އޭނަ ހޯދަން އިއުލާންކުރި އެވެ. އުބާދަތު ހޯދަން ތިން ވަނަ ފަހަރަށް އިއުލާންކުރީ މިއަދެވެ.
އޭނަ ހޯދަން އަލުން އިއުލާންކޮށް ފުލުހުން ބުނީ އުބާދަތު ހޯދަނީ ކްރިމިނަލް ކޯޓަށް ހުށަހަޅާފައިވާ ކެނެބިސް ޓްރެފިކް ކުރުމުގެ މައްސަލައަކާ ގުޅިގެން ކޯޓަށް ހާޒިރުކުރުމަށް ބޭނުންވެ ހާޒިރުކުރެވިފައި ނުވާތީ، ބަންދުގައި ބަހައްޓައިގެން އުބާދަތު މާދަމާ މެންދުރު ފަހު 3:3- އަށް ކޯޓަށް ހާޒިރުކޮށް ދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން ކަމަށެވެ.
އެހެންވެ އޭނައާ ބެހޭ އެއްވެސް މައުލޫމާތެއް ލިބިފައިވާ މީހަކު ވާނަމަ ފުލުހުންގެ ކަސްޓޯޑިއަލް ނަންބަރު 9991442 އަށް ގުޅައި ހިއްސާކޮށް ދޭން ފުލުހުން އެދިފައިވެ އެވެ.