ބޯކޮށް ވާރޭ ވެހޭނެ ކަމަށް ރާއްޖޭގެ ބޮޑު ސަރަހައްދަކަށް މިއަދު ވައިޓް އެލާޓް ނެރެފި އެވެ.
މޫސުމާ ބެހޭ އިދާރާ އިން އެ އެލާޓް ނެރެފައި ވަނީ މެންދުރު ފަހު 1:00 އާ ހަމައަށް ހއ. އަތޮޅުން ފެށިގެން ތ. އަތޮޅާ ހަމައަށެވެ.
އެލާޓް ނެރެފައިވާ ވަގުތުގެ ތެރޭގައި ބޯކޮށް ވާރޭ ވެހުމާ އެކީ ގުގުރައި، ގަޑިއަކު 19-24 މޭލާ ދެމެދު ބާރުމިނުގައި ވައިޖެހި، ވިލާގަނޑުގައި ގަޑިއަކު 50 މޭލަށް ވައިގަދަވެ، ކަނޑުތައް ވެސް ގަދަވާނެ ކަމަށް ލަފާކޮށްފައިވެ އެވެ.
އެހެންވެ ކަނޑު ދަތުރުކުރާ ފަރާތްތަކުން މޫސުމަށް ބަލައިގެން ދަތުރުތައް ކުރަން އިލްތިމާސްކޮށްފަ އެވެ.
ބޮޑުއީދު ޗުއްޓީ އަށް ގިނަ ބަޔަކު އެކި ރަށްރަށަށް ދަތުރުކޮށްފައިވާތީ މިއަދަކީ ވަކިން ހާއްސަކޮށް ކަނޑު ދަތުރުތައް ކުރާ މިންވަރު ވަރަށް ބޮޑަށް އިތުރުވާނެ ދުވަހަކަށް ވާނެ ކަމަށެވެ. އެއީ އީދު ބަންދަށް ފަހު މާދަމާ ސްކޫލްތަކާއި އޮފީސްތައް ވެސް ހުޅުވޭނެތީ އެވެ.