ޝާހްރުކް ޚާނާއި ދެކުނުގެ މަޝްހޫރު ބަތަލާ ސަމަންތާ ރޫތު ޕްރަބޫ ހިމަނައިގެން ފިލްމެއް ހަދަން ޑައިރެކްޓަރު ރާޖްކުމާރު ހިރާނީ ނިންމާފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ ބައެއް މީޑިއާތަކުން މިއަދު ބުނީ މިއީ ވަތަނީ އެކްޝަން އެޑްވެންޗާ ފިލްމެއް ކަމަށެވެ. ނަމަވެސް މިއާ ބެހޭ ގޮތުން ރަސްމީކޮށް އަދި އެއްވެސް ބަހެއް ނެތެވެ.
ހިރާނީގެ އެންމެ ފަހުގެ ފިލްމަކީ ޝާހްރުކާއި ތާޕްސީ ޕައްނޫއާ އެކީ މިދިޔަ އަހަރު ގެނެސްދިން "ޑަންކީ" އެވެ. މި ފިލްމުގެ ފަހުން އޭނަ ދެން ހަދާނެ ފިލްމަކާ ބެހޭ އެއްވެސް ވާހަކައެއް މިހާތަނަށް ހިއްސާކޮށްފައެއް ނުވެ އެވެ. އެކަމަކު އެކްޓަރު ވިކްރާންތު މަސީ ހިމަނައިގެން ހިރާނީ ވެބް ސީރީޒެއް ހަދަން އުޅޭކަމުގެ އަޑުތަކެއް އަރާފައިވެ އެވެ.
ހިރާނީ އަކީ "މުންނާބާއީ އެމްބީބިއެސް" އާއި "3 އިޑިއަޓްސް" އާއި "ޕީކޭ" އަދި "ސަންޖޫ" ފަދަ ކާމިޔާބު ފިލްމުތައް ގެނެސްދިން ޑައިރެކްޓަރެވެ.
މިދިޔަ އަހަރު ޑަންކީ" ގެ އިތުރުން "ޕަތާން" އާއި "ޖަވާން" އިން ވެސް ފެނިގެން ދިޔަ ޝާހްރުކްގެ އަތުގައި މި ވަގުތު ދެ ޕްރޮޖެކްޓެއް އެބައޮތެވެ. އެއީ ޑައިރެކްޓަރު ސުޖޯއިގެ ގޯޝްގެ "ކިންގް" އާއި "ޕަތާން" ގެ ސީކްއެލް އެވެ.