ވަގަށް ޖަލަށް ތަކެތި ވެއްދުމަކީ ޖަލު ބަލަހައްޓާ އިސްވެރިންނާއި މުވައްޒަފުންތަކެއް ގުޅިގެން ހިންގާ ބޮޑު ވިޔަފާރިއެއް ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު މުހައްމަދު ނިހާދު ވިދާޅުވެއްޖެ އެވެ.
ފޯނާއި މަސްތުވާތަކެތި ފަދަ އެއްޗެހި ވަގަށް ޖަލަށް ވެއްދުން ހުއްޓުމަކަށް ގެންނަން އަޅާ ފިޔަވަޅެއްގެ ގޮތުން މާފުށީ ޖަލުގައި މެޓަލް ޑިޓެކްޓަތަކެއް މިހާރު ހަރުކޮށްފައިވާ އިރު، ސްކޭން މެޝިނެއް ވެސް ބަހައްޓަން މަސައްކަތް ކުރައްވަމުން ގެންދަވާ ވާހަކަ ހޯމްލޭންޑް މިނިސްޓަރު އަލީ އިހުސާން ޕީއެސްއެމަށް ދެއްވި އިންޓަވިއުއެއްގައި ވިދާޅުވުމާ ގުޅިގެން ރައްދެއްގައި ނިހާދު އެކްސް ޕޯސްޓެއްގައި ވިދާޅުވީ ޖަލަށް ތަކެތި ވެއްދުމަކީ ޖަލު ބަލަހައްޓާ ވެރިންނާއި އިސް މުވައްޒަފުންތަކެއް ގުޅިގެން ހިންގާ ބޮޑު ވިޔަފާރިއެއް ކަމަށެވެ.
Thiyaiee Jalu balahattaa verinnaai iss muazzafun thakeh gulhigen hingaa bodu viyafaari eh! Thiyakamah halleh nugeneveyne Hama ekanhi scan machine bahattaigen!
— Feydhoo Meehaa (Mohamed Nihad) (@nihad_m) June 22, 2024
"ތިޔަ ކަމަށް ހައްލެއް ނުގަނެވޭނެ ހަމައެކަނި ސްކޭން މެޝިނެއް ބަހައްޓައިގެނެއް،" ވެރިކަން ކުރާ ޕީއެންސީ އަށް ނިސްބަތްވާ ނިހާދު ވިދާޅުވި އެވެ.
ޖަލަށް ފޯނާއި މަސްތުވާތަކެތި ވަގަށް ވެއްދުމުގެ މައްސަލަތައް ހިނގުމަކީ ވަރަށް އާންމު ކަމެކެވެ. އެގޮތުން ކުރިން ފެންމަތިވެފައިވާ މިފަދަ ކޭސްތަކުގައި ޖަލު އޮފިސަރުން ޝާމިލުވާކަން ވެސް ފާހަގަ ކުރެވިފައިވެ އެވެ.