މީގެ 27 އަހަރު ކުރިން މަރުވެފައިވާ ޕާކިސްތާންގެ މަޝްހޫރު ލަވަކިތުންތެރިޔާ ނުސްރަތު ފަތޭ އަލީ ޚާންގެ އާ އަލްބަމެއް މި އަހަރުގެ ސެޕްޓެމްބަރުގައި ނެރެން ނިންމާފައިވާކަން އިއުލާންކޮށްފި އެވެ.
"ގެއްލިފައި އޮތް" އަލްބަމެއްގެ ގޮތުގައި ސިފަކޮށް "ޗެއިން އޮފް ލައިޓް" ކިޔާ އަލްބަމް ސެޕްޓެމްބަރު 20 ގައި ނެރޭނެކަން އިއުލާންކުރީ ނުސްރަތުގެ ނަމުގައި ހިންގަމުން އަންނަ މިއުޒިކް ބޭންޑްގެ ރަސްމީ އިންސްޓަގްރާމް އެކައުންޓްގަ އެވެ. އޭގައި ބުނީ ނުސްރަތާ އެކީ އިތުރު އަށް ފަންނާނެއްގެ އަޑު ވެސް އިވިގެން ދާނެ އަލްބަމްގައި އޭނަގެ ވަރަށް ހާއްސަ ހަތަރު ގައްވާލީ ލަވައެއް ވެސް ހިމެނނެ ކަމަށާއި އޭގެ ތެރެއިން އެއް ގައްވާލީ އަކީ މުޅިން އާ ޓްރެކެއް ކަމަށެވެ.
އުމުރުން އެންމެ 48 އަހަރުގައި 1997 ގައި މަރުވި ނުސްރަތު އެންމެ ހާއްސައީ ވެސް ވަރުގަދަ، ބޮޑެތި ގައްލާވީ ލަވަތަކަށެވެ. އެހެންވެ އޭނަ ސިފަކުރަނީ "ކިންގް އޮފް ކިންގްސް އޮފް ގައްވާލީ" ގެ ގޮތުގަ އެވެ.
އިންސްޓަގްރާމް ޕޯސްޓްގައިވާ ގޮތުން "ޗެއިން އޮފް ލައިޓް" ގައި ހިމެނޭ ލަވަތައް ރެކޯޑްކޮށްފައި ވަނީ ރިއަލް ރެކޯޑްސް ސްޓޫޑިއޯގައި 1990 ގަ އެވެ. އަދި މި އަލްބަމް ނެރޭނީ ރިއަލް ރެކޯޑްސްގެ ލޭބަލްގަ އެވެ.
"ޗެއިން އޮފް ލައިޓްސް" މިހާރު އޮތީ ޕްރީ-އޯޑަރަށް ވެސް ހުޅުވާލައިފަ އެވެ.
ނުސްރަތަކީ ބޮލީވުޑްގެ ވަރަށް ގިނަ ފިލްމުތަކަށް ވެސް މިއުޒިކް ހަދައިދީ، ލަވަ ކިޔާފައިވާ ވަރަށް މޮޅު ފަންނާނެކެވެ.