ބޮޑު އީދު ދުވަހު ހުޅުމާލޭގައި ހިންގި މާރާމާރީއެއް ހުއްޓުވަން މަސައްކަތް ކުރި ފުލުހެއްގެ ގައިގައި ކާރަކުން ޖެއްސި މައްސަލައިގައި އިއްޔެ ހައްޔަރުކުރީ ފުލުހެއްގެ ކުރީގެ ވެރިއެއްގެ ދަރިއެެއް ކަމަށް ފުލުހުން ބުނެފި އެވެ.
އެ މައްސަލައިގައި އިއްޔެ ހައްޔަރުކުރީ ކުރީގެ ޑެޕިއުޓީ ކޮމިޝަނަރު އަލީ ރަޝީދުގެ ފިރިހެން ދަރިފުޅެވެ. އަދި އޭނަ ދުއްވި ކާރު ރަޖިސްޓަކޮށްފައި އޮތީ ވެސް އަލީ ރަޝީދުގެ ނަމުގަ އެވެ.
ފުލުސް ގައިގައި ކާރުން ޖެއްސީ އީދު ދުވަހު ފަތިހު ހުޅުމާލެ 10 ނަންބަރު ފްލެޓު ކައިރިންނެވެ. އެ ސަރަހައްދަށް ފުލުހުން ސައިކަލެއްގައި ދިޔައީ މާރާމާރީއެއް ހިންގާކަމުގެ ރިޕޯޓެއް ލިބިގެންނެވެ. އެ ހާދިސާއާ ގުޅިގެން ފުލުސް މީހާ އަށް ހޮސްޕިޓަލްގައި ފަރުވާ ވެސް ދިނެވެ.
ފުލުހުންގެ ތަރުޖަމާނުގެ މަގާމުގައި ހުންނެވި އެސިސްޓަންޓް ކޮމިޝަނަރު އަހުމަދު ޝިފާން އިއްޔެ ވިދާޅުވީ ކާރުން ޖެއްސި މީހާ ހައްޔަރުކުރީ އިއްޔެ ހަވީރު 5:44 އެހާއިރު ކަަމަށެވެ. އޭނަ އަކީ ފުލުހުންގެ ގައިގައި ކާރުން ޖައްސައި ފިލި ދެ މީހުންގެ ތެރެއިން ދެވަނަ މީހާ އެވެ.
އަނެއް މީހާ ފުލުހުން ހައްޔަރުކުރީ އެ ހާދިސާ ހިންގި ދުވަހު އެވެ. އޭނަގެ ބަންދަށް ކްރިމިނަލް ކޯޓުން އޮތީ 15 ދުވަސް ވެސް ޖަހައިފަ އެވެ