މާލޭގެ ކަނޑުގެ ބަދަރާއި ތިލަފުށީ ކަނޑުގެ ބަނދަރު ބޭރުގެ ފަރާތަކަށް ދިގު މުއްދަތަށް ކުއްޔަށް ދިނުމުގެ މަޝްވަރާތަކެއް ސަރުކާރުން ކުރިއަށް ގެްނދާ ކަމަށް ވިދާޅުވެ ކުރީގެ ހޯމް މިނިސްޓަރު އުމަރު ނަސީރު ކަންބޮޑުވުން ފާޅު ކުރައްވައިފި އެވެ.
މިދިޔަ އަހަރު ރިޔާސީ އިންތިހާބުގައި ވެސް އަމިއްލަ ގޮތުން ވާދަކުރެއްވި އުމަރު ފޭސްބުކް ޕޯސްތެއްގައި ވިދާޅުވީ ދިވެހީންގެ އަމިއްލަ އެސެޓްތައް އެހެން ފަރާތްތަކަށް ދޫކޮށްލުމަކީ "ދިވެހީންގެ ރާއްޖެ" އިން ކޮށްގެން ވާނެ ކަމެއް ނޫނެވެ.
"'ދިވެހީންގެ ރާއްޖެ އިން ކުރައްވަންވާނެ ކަމަކީ އެސެޓްތައް އުފައްދާ އެ ތަކެތި ދިވެހިންގެ އަތްމަތީގައި ބެހެއްޓުން. މިފަދަ އެސެޓްތައް ބޭރުގެ ފަރާތަކަށް ވިއްކާލުމާއި ދިގު މުއްދަތަށް ކުއްޔަށް ދިނުމަކީ ކަންކަން އަމިއްލަ އަށް ކުރަން ނުދަންނަ، ކަންނެތް މީހުންއު ޅޭ ޤައުމުތަކުން ކުރާ،" އޭނަ ވިދާޅުވި އެވެ.
އުމަރު ވިދާޅުވީ މާލޭގެ އެއާޕޯޓް އިންޑިއާ އަށް ވިއްކައިލުމަށް ކުރިން ކުރެވުނު މަސައްކަތް ފަދަ ކަންކަމަކީ އިގުތިސާދީ ގޮތުން ނުރައްކާތެރި ކަންކަން ކަމަށެވެ.
"މީގެ ސަބަބުން މުދަލުގެ އަގުބޮޑުވެ، ދިވެހި ވިޔަފާރި ތަކަށް އެތަށް ދަތިތަކާ ކުރިމަތިވާނެ،" އޭނަ ވިދާޅުވި އެވެ. "ދައުލަތުގެ މި ފަދަ ސްޓްރެޓެޖިކް އެސެޓްތަކަކީ އަބަދުވެސް ދިވެހީންގެ އަތްމަތީގައި ބަހައްޓައިގެން ވީހާ ވެސް ހެޔޮ އަގުގައި ޚިދުމަތް ދެވޭ ތަންތަނަށް ވާން ޖެހޭނެ."
އުމަރުގެ މި ތުހުތުމަތުތަކާ ގުޅިގެން ސަރުކާރުގެ ބަހެއް އަދިއެއް ނެތެވެ.